Ekonomika hám qarjı ministrligi tárepinen járiyalanǵan 2026-jıl ushın Byudjet maǵlıwmatlarına bola, Ózbekstanda miynet haqı, pensiya hám napaqalar muǵdarı 2030-jılǵa shekem hár jılı inflyaciya dárejesinen joqarı pátlerde arttırıp barıladı. Bul ilaj xalıqtıń real dáramatların saqlap qalıw hám sociallıq qorǵawdı kúsheytiwge qaratılǵan.

Pensiya támiynatında jańa basqısh: transfertler basqıshpa-basqısh arttırıladı. Makroekonomikalıq hám fiskal siyasattıń 2030-jılǵa shekem mólsherlengen tiykarǵı maqsetlerinde mámleketlik pensiya sistemasın reformalaw ayrıqsha orın iyeleydi. Reformalar nátiyjesinde byudjetten Pensiya qorına ajıratılatuǵın qarjılardıń kólemi basqıshpa-basqısh qısqaratuǵını kútilmekte.
2026-jılda Pensiya qorınıń finanslıq kórsetkishleri tómendegishe prognoz etilmekte. Qalǵan qarjıları – 3,9 trillion sum, dáramatları – 64,7 trillion sum, qárejetleri – 86,1 trillion sumdı quraydı.
Qárejetler dáramatlardan joqarı bolǵanı ushın qordıń jetispewshiligin qaplaw maqsetinde mámleketlik byudjetten 23 trillion sumlıq transfert ajıratılıwı rejelestirilgen. Bul ótken jılǵa salıstırǵanda 13,8 procentke kóp.
Ekonomika hám qarjı ministrligi qáliplestirip atırǵan prognozlarǵa itibar bersek, 2027-jılı dáramatlar 75 trillion sum, qárejetler 95,1 trillion sum, mámleketlik transfert 20 trillion sumdı quramaqta.
Kelesi úsh jıl ishinde mámlekette pensionerler sanı 489 mıń adamǵa artıp, 4,76 millionǵa jetiwi kútilmekte. Sonıń menen birge, hár jılı pensiya jasına jetip atırǵan shaxslardıń sanı 5,1 procentke ósip baradı.
Bul tendenciya pensiya sistemasına túsetuǵın júkti jáne de arttıradı hám sistemanı turaqlı saqlaw ushın sociallıq-ekonomikalıq ilajlardı talap etedi.
Ministrliktiń esap-sanaqlarına bola, byudjet xızmetkerleriniń miynet haqısınıń 1 procentke arttırılıwı mámleketlik byudjet qárejetlerin 1,67 trillion sumǵa arttıradı. Pensiyalardıń 1 procentke arttırılıwı bolsa byudjetke 861 milliard sumǵa túsedi. Sociallıq napaqa alıwshı shańaraqlar sanınıń 10 procentke kóbeyiwi derlik 1,6 trillion sum qosımsha qárejetti talap etedi.
Byudjettegi jańa kórsetkishler Ekonomika hám qarjı ministrliginiń usı jıldıń iyul ayında usınǵan fiskal strategiyasında belgilengen sanlardan sezilerli dárejede parıq qıladı. Máselen, aldınǵı prognozlarǵa bola 2028-jılı Pensiya qorınıń jetispewshiligin qaplaw ushın 26 trillion sum transfert ajıratılıwı kútilgen edi. Jańa esap-sanaqlar bolsa itimallı únemlew pensiya reformaları esabınan támiyinleniwi múmkin ekenligin kórsetpekte.

ÓzA