Sawda-sanaat palatası Qaraqalpaqstan Respublikası basqarması tárepinen ǵalaba xabar quralları ushın press-tur shólkemlestirilip, jurnalistler Nókis qalasında jaylasqan «NUKUS LAK BO’YOQLARI” JShJǵa alıp barıldı.

Bul kárxana 2018-jılı “Namangan porloq tamirlash servis” JShJ direktorı Hojiakbar Habibullaev tárepinen shólkemlestirilgen. “Qurılıs materialları hám lak boyawların islep shıǵarıw” joybarın ámelge asırıw maqsetinde investiciyalıq (1,0 mln. dollar ekvivalentinen az bolmaǵan) hám sociallıq (100 jańa jumıs ornı) minnetlemeler belgilengen halda tikkeley “nol”lik satıp alıw bahasında satıw boyınsha aldı-sattı shártnaması dúzilip, búgingi kúnge shekem kóplegen shólkemlestiriw jumısları ámelge asırılǵan. Búgingi kúnde kárxana ushın berilgen imaratta kapital ońlaw hám rekonstrukciyalaw jumısları tolıq juwmaqlanǵan.
H.Habibullaev elimizde sanaat qurılıs tarawın rawajlandırıw jolında nátiyjeli miynet etip kiyatırǵan tájiriybeli jaslardan.
Qurılıs ónimleriniń básekige shıdamlılıǵın arttırıw maqsetinde onıń tikkeley basshılıǵında 2019-jılı kárxanada “ISO 9001” xalıqaralıq sapa standartları engizilgen.
2019-jılı “Tashabbus” tańlawınıń Qaraqalpaqstan Respublikası basqıshında “Jıldıń eń jaqsı jas isbilermeni” nominaciyası boyınsha 1-orındı qolǵa kirgizgen.
2024-jılı Qaraqalpaqstan Respublikası Joqarǵı Keńesi tárepinen “Úmit ushqını” kókirek belgisi menen sıylıqlandı.
– Men 1994-jılı Namangan qalasında tuwıldım, 2012-jılı Namangan yuridikalıq kolledjin tamamladım, ÓzLiDeP aǵzasıman. Bul jerge Nókiste jasaytuǵın tanısım shaqırıp, maǵan da qurılıs materialların islep shıǵarıwdı úyret degeni ushın kelip edim. Basqa wálayatlarda da kárxanalarım bar, – deydi H.Habibullaev.
Kárxanamız tárepinen lak, boyaw, shpatlyovka, plita jelimi, gruntovka, PVA jelimi, suyıq ayna, travertin (lak), emal boyaw sıyaqlı jámi 35 túrdegi qurılıs ónimleri islep shıǵarıladı. Kárxanada 2022-jılı 2,5 mlrd. sumlıq, 250, 2023-jılı 2,271 mlrd. sumlıq, 227,1, 2024-jılı 3,204 mlrd. sumlıq, 320,4 tonna ónim islep shıǵarıldı. Kárxanamızdıń usı “Kók Saray” qurılıs materialları hám lak-boyawların islep shıǵarıw bóliminde házirgi waqıtta 60 adam jumıs penen támiyinlengen.
Press-tur dawamında qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.
M.Habibullaevtıń túsirgen súwretleri