Ózbekstan Respublikası Oliy Majlisi Senatı hám Franciya Respublikası parlamenti Senatı arasındaǵı parlamentleraralıq birge islesiw boyınsha toparlardıń onlayn ushırasıwı bolıp ótti.

Onda eki mámleket arasındaǵı parlamentleraralıq birge islesiwdi bunnan bılay da rawajlandırıw, eki tárepleme qatnasıqlardı bekkemlew máseleleri dodalandı.
Ózbekstan – Franciya birge islesiwi strategiyalıq sheriklik dárejesine kóterilgeni atap ótildi. Bul joqarı dárejedegi sapar etiwler hám iri birgeliktegi joybarlardıń ámelge asırılıp atırǵanı menen túsindiriledi.
Ekonomikalıq birge islesiwdi keńeytiw hám bir qatar tarmaqlarda óz-ara baylanıslardı rawajlandırıw boyınsha da pikir alısıldı. Mádeniy-gumanitarlıq baylanıslardı bekkemlewge ayrıqsha itibar qaratıldı. Atap aytqanda, mádeniy miyras obektlerin restavraciyalaw boyınsha ámelge asırılıp atırǵan birgeliktegi baslamalar hám bilimlendiriw tarawındaǵı birge islesiwdi keńeytiwdiń áhmiyetine itibar qaratıldı.
Francuz tilin úyreniwge qızıǵıwshılıq barǵan sayın artıp atırǵanı, sonday-aq, eki mámleket joqarı oqıw orınları arasında birge islesiw izbe-iz keńeyip atırǵanı atap ótildi.
Turistlik baylanıslardı janlandırıw, birgeliktegi turizm forumları hám mádeniy ilajlardı ótkeriw boyınsha usınıslar bildirildi.
Ushırasıw juwmaǵında parlamentleraralıq birge islesiw boyınsha toparlardıń jumısın sistemalı jolǵa qoyıw, olardıń hár jılı keminde bir márte birgeliktegi májilislerin ótkeriw jáne gezektegi májilisti Ózbekstan Respublikasında shólkemlestiriwge kelisip alındı.

ÓzA