Jaslarǵa baylanıslı mámleketlik siyasattı nátiyjeli ámelge asırıw, jaslardı Watansúyiwshilik, milliy dástúr hám qádiriyatlarımızǵa húrmet ruwxında tárbiyalaw ushın muǵallimlerdiń teoriyalıq bilimleri hám ámeliy kónlikpelerin arttırıw maqsetinde, Taxtakópir rayonındaǵı “Dáwqara” stadionında “Eń aldınǵı shaqırıqqa shekemgi baslanǵısh tayarlıq – Watan tayanısh otryadı basshısı” jarısınıń rayonlıq basqıshı bolıp ótti.

Jarısqa Mektepke shekemgi hám mektep bilimlendiriwi bólimine qaraslı ulıwma orta bilim beriw mektepleriniń shaqırıqqa shekemgi baslanǵısh tayarlıq páni muǵallimleri qatnasıp, ózleriniń teoriyalıq bilimleri, ámeliy kónlikpeleri, fizikalıq jaǵdayı hám jaslar menen islesiwdegi nátiyjeliligin sınnan ótkerdi.
Qızıqlı ótken jarıs juwmaǵında, birinshi orındı 6-sanlı ulıwma orta bilim beriw mektebiniń muǵallimi B. Berdiyarov jeńip alıwǵa miyasar boldı.
Sıylı ekinshi hám úshinshi orınlar bolsa, 22-sanlı mektep muǵallimi K. Nurmanbetov hám 1-sanlı mektep muǵallimi S.Allashovlarǵa nesip etti.
Jarıs sońında jeńimpazlar shólkemlestiriwshiler tárepinen tayarlanǵan diplom hám estelik sawǵaları menen sıylıqlandı.

Adilbay Orazov,
Qaraqalpaqstan xabar agentligi sholıwshı