Ózbekstan Respublikası Prezidentiniń “Xalıqtıń salamatlıǵın hám millet genofondın náshebentlik hám narkojınayatlardan nátiyjeli qorǵaw boyınsha kompleksli ilajlar haqqında”ǵı pármanınıń orınlanıwı sheńberinde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında “Biz, jaslar – náshebentlik hám AIJSqa qarsımız!” atamasında úgit-násiyatlaw ilajı shólkemlestirildi.

Ilaj jaslar arasında salamat turmıs tárizin qáliplestiriw hám zıyanlı ádetlerden qorǵawdıń áhmiyetin arttırıwǵa qaratılǵan.
Ilajdı filial direktorınıń Jaslar máseleleri hám ruwxıy-aǵartıwshılıq isleri boyınsha birinshi orınbasarı X.Abdijaliev, Qaraqalpaqstan Respublikası AIJS qa qarsı gúresiw orayınıń shıpaker-metodisti A.Jánibekova hám shıpaker járdemshisi D.Dalievalar shıǵıp sóylep, studentler arasında salamat turmıs tárizin hám profilaktika mádeniyatın qáliplestiriwdiń áhmiyetin ayrıqsha atap ótip, náshebentliktiń insan salamatlıǵı, bilimlendiriw procesi hám jámiyetlik turmısqa unamsız tásiri haqqında maǵlıwmatlar berildi.
Sonday-aq, ilajda náshebentliktiń aqıbetleri, AIJS infekciyasınıń juǵıw jolları, jeke gigiena hám profilaktika ilajlarınıń áhmiyeti haqqında túsinikler berildi.
Qánigeler tárepinen test nátiyjeleriniń sır saqlanıwı hám erte diagnoz qoyıwdıń áhmiyeti de ayrıqsha atap ótilip, filial oqıtıwshıları, xızmetkerleri hám studentleri ıqtıyarıy túrde qan tapsırıp, olar AIJStı anıqlaw ushın biypul ekspress-testten ótiw imkaniyatına iye boldı. Process sanitariyalıq-gigienalıq talaplarǵa tolıq ámel etken halda shólkemlestirildi hám bul profilaktikalıq ilaj sıpatında jaslar hám xızmetkerlerdiń salamatlıǵın qorǵawǵa xızmet etedi.
Ilajda qatnasıwshılar qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.