Mámleketimiz basshısınıń “Sudyalar jámiyetshiligi uyımları jumısınıń nátiyjeliligin hám ashıq-aydınlıǵın arttırıw jáne sud erkinligi kepilliklerin bunnan bılay da kúsheytiw ilajları haqqında”ǵı pármanı qabıl etildi.

Oǵan bola, sudyalardı gezektegi 10 jıllıq múddetke tayınlaw (saylaw) tártibi biykar etiledi. Sudyalıq lawazımlarına talabanlardı dáslep 5 jıl múddetke, keyin ala múddetsiz dáwirge tayınlaw (saylaw) tártibi belgilenedi.
Rayonlararalıq, rayonlıq, qalalıq sudlardıń baslıqları hám olardıń orınbasarları lawazımlarına talabanlardı anıq ólshemlerge bola sudyalar arasında ashıq tańlaw tiykarında tańlaw tártibi ornatıladı.
Sudyanıń kásiplik jumısın bahalawda “hadallıq,” “kásiplik uqıplılıq” hám “sudyalar ádebi qaǵıydalarına ámel etiw” talaplarınıń anıq normaları nızam dárejesinde belgilenedi.
Sudyalar joqarı keńesiniń turaqlı tiykarda jumıs alıp barıwshı sudyaları lawazımlarına talabanlar tiyisli sud sudyaları kvalifikaciyalıq kollegiyaları tárepinen usınıs etiledi.
Keńestiń turaqlı tiykarda jumıs alıp baratuǵın sudyaları lawazımına, qaǵıyda túrinde, sudya sıpatında keminde 7 jıl islegen sudyalardıń kandidaturası kórsetiliwi múmkin.
Pármanǵa bola, Sudyalar jámiyetshiligi uyımlarınıń biyǵárezligin arttırıw maqsetinde Keńes hám Sudyalar joqarı mamanlıq kollegiyasınıń birgeliktegi májilisin ótkeriw tártibi biykar etiledi.
Keńes baslıǵına, onıń konstituciyalıq statusınan kelip shıǵıp, sudyalardıń kvalifikaciyalıq kollegiyaları tárepinen intizamıy is tiykarsız tamamlanǵan yamasa intizamıy jaza islengen qılmısqa sáykes emes dep tabılǵan jaǵdayda, kvalifikaciyalıq kollegiyalardıń qararların qayta kórip shıǵıw boyınsha usınıs kirgiziw, keńestiń strukturası hám shtat kestesin belgilengen shtat birlikleri sheńberinde erkin túrde tastıyıqlaw wákillikleri beriledi.
2025-jıl 15-dekabrge shekem Keńestiń rásmiy veb-saytında sud sistemasındaǵı bos basshılıq hám joqarı turıwshı sudyalıq lawazımlarına baylanıslı maǵlıwmatlar hám olardı iyelew ushın tańlawda qatnasıw tártibi, sud sistemasındaǵı sudyalıq lawazımları, sonıń ishinde, basshılıq hám joqarı turıwshı sudyalıq lawazımlarına talabanlardı tańlaw jáne tayınlaw boyınsha barlıq basqıshlarǵa baylanıslı maǵlıwmatlar ashıq járiyalanıp barıladı.

ÓzA