Ózbekstan Respublikası Prezidenti janındaǵı Basqarıw nátiyjeliligi agentligi hám Koreya xalıqaralıq birge islesiw agentligi (KOICA) menen birgelikte “Ózbekstanda mámleketlik xızmetkerlerdiń potencialın arttırıw baǵdarlaması” ámelge asırılmaqta.

KIPA delegaciyasınıń Tashkent qalasına saparı sheńberinde joybardı iske qosıw máresimi shólkemlestirildi.
Atap ótiw kerek, KIPA – Koreya mámleketlik basqarıw institutı bolıp, Koreya húkimeti tárepinen qarjılandırıladı. Institutqa 1991-jıl 5-oktyabrde tiykar salınǵan.
Instituttıń maqseti basqarıw sistemasın rawajlandırıw hám jaqsılaw boyınsha xalıq mápi hám sociallıq reformalarǵa xızmet etetuǵın izertlewler ótkeriw, mámleketlik basqarıw tarawında professional, juwapkershilikli hám áhmiyetli izertlewler ótkeriw arqalı húkimet siyasatın qollap-quwatlaw.
Ózbekstanda mámleketlik xızmetkerlerdiń potencialın arttırıwǵa baylanıslı joybardıń maqseti mámleketlik xızmet nátiyjeliligin arttırıw, kadrlardıń professional tájiriybesin arttırıwdı támiyinlewden ibarat.
Joybar sheńberinde mámleketlik shólkemlerde jumıs islew ushın professional qánigeliklerdi anıqlaw hám tán alıw maqsetinde insan resursların sertifikatlastırıw sisteması engiziledi, pilot ministrliklerde bolsa lawazımlar analizi ótkeriledi. Sırt el tájiriybelerin úyreniw maqsetinde ilajlar ámelge asırıladı.

ÓzA