Oliy Majlis Nızamshılıq palatasındaǵı ÓzLiDeP frakciyasınıń májilisinde bir qatar máseleler dodalandı. Sonıń ishinde, deputatlar Túrkmenstan Prezidenti S.Berdimuhamedovtıń elimizge ámelge asırǵan rásmiy saparı Ózbekstan hám Túrkmenstan arasındaǵı ázeliy doslıq hám tuwısqanlıq baylanısların jáne de bekkemleytuǵının atap ótti.

“Shavat-Tashawız” birgeliktegi shegaraaldı sawda zonası eki xalıq arasındaǵı sawda-ekonomikalıq baylanıslardı jańa basqıshqa alıp shıǵıwı, sawda maydanı eki tárep ónimleri ushın jańa bazarlar ashıp atırǵanı atap ótildi.
Atap ótilgenindey, Sawda zonasınıń infrastrukturası zamanagóy tárizde shólkemlestirilgeni, bajıxana, veterinariya, fitosanitariyalıq hám bank xızmetleriniń bir jerde jámlengeni isbilermenler ushın keń imkaniyat jaratadı. Bul bolsa tovar aylanısın tezlestirip, isbilermenlik jumısın jeńilletiw, ashıq-aydınlıq hám qolaylılıqtı támiyinlewge xızmet etedi.
Jańa posttıń texnikalıq jaqtan tolıq úskenelengeni bajıxana qadaǵalawınıń nátiyjeliligin jáne de arttıratuǵını sózsiz.
Májiliste bul joybar tek ǵana eki qońsı mámleket emes, al birge islesiwden mápdar bolǵan sırt elli investorlar ushın da áhmiyetli sawda orayına aylanatuǵınına isenim bildirildi.
Atap ótilgenindey, bul orınnıń ashılıwı regionda jańa ekonomikalıq mánziller, birgeliktegi joybarlar hám investiciya aǵımlarınıń keńeyiwine tiykar jaratadı. Eń áhmiyetlisi, xalıqlarımız arasındaǵı doslıq, óz-ara húrmet hám tuwısqanlıq ruwxın jáne de kúsheytti.

ÓzA