Korrupciyaǵa qarsı gúresiw – bul tek jınayatshılıqtı azaytıw emes. Bul mámlekettiń turaqlı rawajlanıwı, basqarıw sistemasınıń ashıq-aydın hám nátiyjeli islewin támiyinlewge qaratılǵan strategiyalıq wazıypa bolıp tabıladı.

Ózbekstan Respublikasında búgingi kúnde korrupciyanı túp-tiykarı menen saplastırıw maqsetinde úzliksiz reformalar ámelge asırılmaqta. Mámleketlik basqarıwda ashıq-aydınlıqtı kúsheytiw, juwapkershilikti arttırıw hám hadallıq principlerin hár bir tarawda bekkemlew – bul processtiń tiykarǵı baǵdarların quraydı.
Ózbekstan Respublikası Prezidenti 2025-jıl 29-iyul kúni turmıslıq korrupciyaǵa qarsı gúresiw hám onıń aldın alıw ilajları boyınsha ótkerilgen ilajda prokuratura uyımları xızmetkerleri tárepinen korrupciyalıq jaǵdaylar júz beriwiniń aldın alıwda sistemalı jantasıw, bunda korrupciya hám basqa túrdegi huqıqbuzarlıqlarǵa jol qoymaw boyınsha úgit-násiyat jumısların kúndelikli iske aylandırıw, korrupciyadan jıraq «Jańa Ózbekstan ushın birleseyik!» súreni astında túsinik hám eskertiw ilajların kúsheytiw tapsırması berilgen edi. Usı tapsırmadan kelip shıǵıp, Ózbekstan Respublikası Bas prokuraturası janındaǵı Májbúriy orınlaw byurosınıń Qaraqalpaqstan Respublikası basqarmasında Jeke qáwipsizlikti támiyinlew sektorı xızmetkerleri baslaması menen ilaj ótkerildi.
– «Korrupciyadan jıraq Jańa Ózbekstan ushın birleseyik!» súreni astında usınday ilajlar byuronın barlıq rayonlıq hám qalalıq bólimlerinde ótkeriliwi támiyinlendi, – deydi basqarma baslıǵınıń orınbasarı V.Erniyazova. – Maqset byuro xızmetkerleri arasında dámegóyliktiń, korrupciyanıń aqıbetleri boyınsha túsinik jumısların kúsheytiw bolıp tabıladı.
Korrupciyanı azaytıw – jámiyettiń isenimin tiklew, ekonomikanıń salamat rawajlanıwına sharayat jaratıw hám hár bir puqara ushın teń imkaniyatlardı támiyinlewdiń áhmiyetli shárti esaplanadı.

Qaraqalpaqstan xabar agentligi