Ózbekstan Respublikası Oliy Majlisi Senatı tárepinen Nókis qalasındaǵı Jaslar orayında “Jaslardı milliy hám ulıwmainsanıylıq qádiriyatlar jáne nızamǵa húrmet tiykarında tárbiyalawdıń áhmiyetli máseleleri” atamasında dógerek sáwbeti bolıp ótti.

Onda Oliy Majlis Senatı aǵzası Z.Bekatova hám Qaraqalpaqstan Respublikası Joqarǵı Keńesiniń deputatı O.Niyazovalar qatnasıp, jas áwladtı ruwxıy bárkamal, nızamlarǵa húrmet ruwxında tárbiyalaw búgingi kúnniń eń áhmiyetli wazıypalarınan ekenin atap ótti.
Ushırasıwda atap ótilgenindey, jaslardı milliy hám ulıwmainsanıylıq qádiriyatlar tiykarında tárbiyalaw, olardıń sanasında joqarı mánawiyattıń turaqlı rawajlanıwı jámiyette tınıshlıq hám tatıwlıqtı támiyinlewdiń áhmiyetli shárti bolıp esaplanadı.
Búgingi kúnde zıyanlı málimleme aǵımları, hár qıylı sırtqı tásirler hám qáwip-qáterler kúsheygen sharayatta jaslardıń erkin pikirlewi, durıs qarar qabıl ete alıwı, turmıslıq poziciyasın durıs qáliplestiriwge járdemlesiw áhmiyetli wazıypa bolıp esaplanadı. Jaslardı milliy hám ulıwmainsanıylıq qádiriyatlarǵa muwapıq tárbiyalaw, olardıń sanasında joqarı mánawiyattıń turaqlı rawajlanıwı jámiyette tınıshlıq hám tatıwlıqtı támiyinlewdiń áhmiyetli shárti bolıp esaplanadı.
Ilaj dawamında jaslar arasında ruwxıy immunitetti bekkemlew, olarǵa durıs málimleme jetkeriw, huqıqıy mádeniyattı arttırıw máseleleri boyınsha usınıs hám baslamalar tıńlandı.
Ushırasıw juwmaǵında jaslar arasında bunday úgit-násiyatlaw jumısları izbe-iz dawam ettiriliwi, olardı hár tárepleme qollap-quwatlaw mámleketlik siyasattıń tiykarǵı baǵdarlarınan biri ekeni atap ótildi.

Qaraqalpaqstan xabar agentligi