“Hududgaz Qaraqalpaqstan” gaz támiynatı filialınıń qala hám rayonlardaǵı gaz támiynatı bólimleri tárepinen jámi 387 mıń 693 xojalıq tábiyǵıy hám suyıltılǵan gaz benen támiyinlengen bolıp, sonnan 289 mıń 527 xojalıq (74,6%) tábiyǵıy, 98 mıń 166 xojalıq (25,4%) suyıltılǵan gaz benen támiyinlengen. Bunnan basqa, respublikamız boyınsha jámi 6380 kótere tutınıwshılar bar. Olardıń 133 in sanaat kárxanaları, 138 in avtomobil gaz toltırıw kompressorlıq stanciyaları, 826 sın sociallıq taraw obektleri hám 5283 in jeke tártiptegi isbilermenler quraydı.

– Respublikamız boyınsha búgingi kúnde jámi 9847,7 kilometrlik hárekettegi gaz tarmaqları bar, – deydi “Hududgaz Qaraqalpaqstan” gaz támiynatı filialı ekspluataciya bóliminiń baslıǵı Artıqbay Jiemuratov. – Sonnan, 605,6 kilometrlik bólegi joqarı, 3739,1 kilometrlik bólegi orta, 5503,0 kilometrlik bólegi tómen basımlı gaz tarmaqları bolıp esaplanadı.
Gaz tarmaqlarınıń 885,4 kilometrlik bólegi jer astında hám 8962,3 kilometrlik bólegi jer ústinde jaylasqan. Sonnan, paydalanıw ushın tapsırılǵan tarmaqlardan múddetleri boyınsha 10 jılǵa shekemgisi 387,8, 10-20 jılǵa shekemgisi 1452,1, 20-30 jıl hám onnan kóp paydalanıwda bolǵan gaz tarmaqları 8007,8 kilometrdi quraydı. Sonıń menen birge, hárekette jámi 3568 GBP bar. Sonnan, 268 i joqarı, 3300 i orta basımlı. 138 GBP da gaz tarmaqları jemiriliwiniń aldın alıw ushın elektro-ximiyalıq qorǵaw úskeneleri qollanılmaqta.
Tábiyǵıy gaz tutınıwshılarına respublikamızdaǵı 53 gaz bólistiriw stanciyaları arqalı tábiyǵıy gaz jetkerip beriledi.
Sonıń ishinde, filialǵa qaraslı obektlerdiń 2025-2026-jılǵı gúzgi-qısqı máwsiminde turaqlı islewin támiyinlewde rejeler islep shıǵıldı hám búgingi kúnde gaz tarmaqların rekonstrukciyalaw hám iri ońlaw jumısları 101 procentke (68,5 km) orınlandı.
Sonday-aq, joqarı basımlı gaz bólistiriw qurılmaların tolıq ońlaw rejesi de 100 procent orınlandı.
Reje boyınsha 3568 gaz bólistiriw qurılmalarında texnikalıq tekseriwler ótkerildi. Al, gaz tarmaqlarınıń tıǵızlıǵın hawa basımı járdeminde sınaw hám tazalaw rejesi 102 procentke orınlandı. Jer astı gaz tarmaqlarınıń jaǵdayın arnawlı ásbaplar járdeminde tekseriw rejesi 885,3 kilometr etip belgilenip, ámelde 904,1 kilometrlik bólegi tekserilip, 102 procentke orınlandı.
Bunnan tısqarı, gaz támiynatın modernizaciyalaw boyınsha 20481 xojalıqta regulyatorlar ornatılıp, 2 basqıshlı sistemaǵa ótkerildi.
Bul baǵdardaǵı jumıslar nátiyjeli dawam etpekte.

Qaraqalpaqstan xabar agentligi