Amerikalı jazıwshı Djordj Samyuel Kleyson qálemine tiyisli «Vavilonnıń eń bay adamı» kitabı dúnyanıń kóplegen tillerine awdarmalanǵan shıǵarmalardıń biri bolıp, ol bunnan derlik júz jıl burın yaǵnıy, 1926-jılı AQShta baspadan shıqqan.

Mine sonnan berli, bul kitap jer júziniń kóplegen ellerinde basıp shıǵarılıp, kitapqumarlar tárepinen súyip oqılmaqta.
Ayırım ellerde bolsa, bul shıǵarma rejissyorlar tárepinen saxnalastırılıp, spektakl sıpatında tamashagóyler názerine usınıldı.
Berdaq atındaǵı Qaraqalpaq mámleketlik akademiyalıq muzıkalı teatrı jámááti de tamashagóylerdiń usınıs hám pikirlerin inabatqa alıp, Djordj Samyuel Kleyson shıǵarması tiykarında “Vavilonnıń eń bay adamı” dramasın saxnalastırıwǵa eristi.
Jaqında rejissyor hám inscenirovka avtorı – M.Reymov tárepinen saxnalastırılǵan bul dramanıń premerası bolıp ótti.
Onda teatr direktorı P.Mamutov tamashagóylerdi jańa spektakldiń saxnalastırıwı menen qutlıqlap, dóretiwshi jámáátke óziniń minnetdarshılıǵın bildirdi.
Spektaklde pul, baylıq hám insannıń olarǵa bolǵan múnásibeti obrazlı túrde sáwlelendirilgen. Qaharmanlar arqalı miynet, puldı únemlew, aqıl menen jumsaw hám baylıqtıń haqıyqıy bahası haqqında pikir júrgiziledi. Puldıń insan ómirindegi ornı, sonıń menen birge onıń xarakter hám qatnasıqlarǵa tásiri saxnalıq sheshimler arqalı kórsetilgen.
Premera joqarı dárejede ótip, tamashagóyler tárepinen jıllı kútip alındı.
Spektakldi mazmunı ápiwayı, túsinikli bolıp, tamashagóylerdiń kewlinen orın aldı.

Adilbay Orazov,
Qaraqalpaqstan xabar agentligi sholıwshısı