Bizge belgili, házirgi kúnde dáwir menen teń qádem taslawda zamanagóy texnologiyalardı ámeliyatqa engiziw eń áhmiyetli másele esaplanadı. Mámleketimiz basshısı turmıstıń túrli tarawlarında jasalma intellektti qollanıw keńeyip atırǵanı, jasalma intellektke tayarlıq xalıqaralıq indeksinde Ózbekstan 17 tekshege kóterilgenin ayrıqsha atap ótti.

Bul baǵdarǵa itibardıń dawamı sıpatında, Ózbekstan Respublikası Prezidentiniń 2024-jıl 14-oktyabrdegi qararı menen Jasalma intellekt texnologiyaların 2030-jılǵa shekem rawajlandırıw strategiyası qabıl etildi. Onda jasalma intellektke tiykarlanǵan baǵdarlamalıq ónimler hám xızmetlerdiń úlesin kóbeytiw, texnikalıq infrastrukturanı keńeytiw, kadrlar potencialın arttırıw sıyaqlı bir qatar ilajlar belgilendi. Usı tapsırmalardan kelip shıǵıp, Qaraqalpaq mámleketlik universiteti janındaǵı pedagog kadrlardı qayta tayarlaw hám olardıń qánigeligin arttırıw aymaqlıq orayında “Pedagoglardıń qánigeligin arttırıw sistemasında jasalma intellekt: psixologiyalıq-pedagogikalıq tárepleri, bilimlendiriwdi sanlastırıw sharayatında pedagoglardıń qánigeligin arttırıw sistemasın modernizaciyalaw” atamasında Respublikalıq ilimiy-ámeliy konferenciya ótkerildi.
– Jasalma intellekt sistemaları búgingi kúnde insaniyat turmısınıń barlıq tarawlarına kirip barıp atırǵanı sır emes, – deydi Aymaqlıq oray bólim baslıǵı Abat Bekmanov. – Jasalma intellekt sistemaları ekonomika, medicina, injenerlik hám basqa da kóplegen tarawlarda qollanılıp kelinbekte. Bunda jasalma intellekt óz aldına ilimiy izertlew tarawı sıpatında ilimpazlar tárepinen úyreniwler alıp barılmaqta hám hátteki 2024-jıldıń juwmaqları boyınsha Nobel sıylıǵına miyasar bolǵan ilimpazlar da óziniń ilimiy jumıslarında jasalma intellekt sistemalarınan paydalanǵanına gúwa bolamız.
Ilajda Qaraqalpaq mámleketlik universiteti janındaǵı pedagog kadrlardı qayta tayarlaw hám olardıń qánigeligin arttırıw aymaqlıq orayında sanlastırıw procesi haqqında maǵlıwmat berildi. Qatnasıwshılar ózlerin qızıqtırǵan sorawlarına juwap aldı.

Qaraqalpaqstan xabar agentligi