Bizge belgili, mámleketimiz basshısınıń tiyisli pármanına bola, 2026-jıldan baslap “Jaslar dápteri” arqalı járdem alıw processleri pútkilley jańalanadı.

Jaslar isleri agentligi direktorı Alisher Sadullaevtıń atap ótiwinshe, bul jańa sistema jaslardıń imkaniyatın keńeytiw hám olardı belsendi turmısqa tartıwǵa xızmet etedi.
– Jaslar ushın eń áhmiyetli baǵdarlamalardan biri bolǵan “Jaslar dápteri” endi pútkilley jańa basqıshqa shıqtı,- dedi A.Sadullaev. – Prezidentimizdiń jańa pármanı jaslardıń turmısına úlken ózgeris alıp keledi. Bunnan bılay “Jaslar dápteri” sisteması imkaniyatlarınan paydalanıwdı qálegen jaslar, aldınnan qoyılǵan talaplardı orınlawı shárt boladı. Bul talaplardıń barlıǵı jeke rawajlanıwǵa qaratılǵan. Yaǵnıy jaslarımız endi “Jaslar dápteri” imkaniyatlarınan paydalanbaqshı bolsa, aldınnan belgilep qoyılǵan talaplardı orınlawı kerek boladı. Sonıń ishinde, “Mutolaa” qosımshasında kitap oqıwı, Ibrat farzandlari baǵdarlaması arqalı til úyreniwi, oqıw procesinde volontyorlıq jumısında qatnasıwı hám 5 baslama olimpiadalarında belsene qatnasıp, nátiyje kórsetiwi talap etiledi.
Prezident pármanına bola, 2026-jıl 1-fevraldan baslap, “Jaslar dápteri” qorlarınan járdem alatuǵın jaslar menen sociallıq birge islesiw sisteması jolǵa qoyıladı. Bunda járdem ajıratıw waqtında máhálledegi jaslar jetekshisi hám járdem alıwshı jas arasında sociallıq shártnama dúziledi.
Sociallıq shártnamada bilimlendiriwdi úzliksiz dawam ettiriw hám joqarı dárejede ózlestiriw, shet tillerin úyreniw, kitap oqıw, volontyorlıq hám óz ústinde islew kónlikpelerin rawajlandırıwǵa qaratılǵan shártler belgilenedi.
Sociallıq shártnama shártlerin turaqlı túrde keminde altı ay dawamında joqarı dárejede orınlaǵan jaslarǵa sociallıq járdem sorap múrájat etken waqıtına qaramastan, oǵan jeńilletilgen túrde gezeksiz sociallıq járdem kórsetiledi.
Eń jaqsı 1 000 jas hár jılı bir márte Jaslarǵa baylanıslı mámleketlik siyasattı qollap-quwatlaw qorına ajıratılǵan qarjılar sheńberinde bazalıq esaplaw muǵdarınıń 3 esesi muǵdarında aqshalay sıylıqlanadı.
Sonday-aq, jaslardıń intakerligi hám belsendiligin xoshametlewge qaratılǵan sıylıqlarǵa usınıs etiledi.

ÓzA