Transport qurallarınıń aldı-sattı bazarı jıldan-jılǵa ósip, rawajlanıp barmaqta. Maǵlıwmatlarǵa bola, 2022-jılı birlemshi bazarda 312 mıń jeńil avtotransport satılǵan bolsa, ekilemshi bazarda bul 1,1 millionnan artqan.

Biraq avtotransport bazarındaǵı aldawshılıqlar, kóz boyawshılıq kóplegen puqaralardıń aldanıwına sebep bolmaqta. Atap aytqanda, avtomobillerdi qımbat satıw maqsetinde odometr kórsetkishi – “probeg”in qálbekilestiriw jaǵdaylarınıń kóp baqlanıp atırǵanı bahanıń jasalma túrde arttırılıwına hám tutınıwshınıń huqıqlarınıń buzılıwına alıp kelmekte.
Oliy Majlis Nızamshılıq palatasındaǵı Ózbekstan “Milliy tiklanish” demokratiyalıq partiyası frakciyasınıń májilisinde kórip shıǵılǵan “Ózbekstan Respublikasınıń Hákimshilik juwapkershilik haqqındaǵı kodeksine ózgerisler hám qosımshalar kirgiziw haqqında”ǵı nızam joybarı mine usı máselege baylanıslı.
Bir topar deputatlar tárepinen nızamshılıq baslaması huqıqı tiykarında islep shıǵılǵan bul nızam joybarı menen Ózbekstan Respublikasınıń Hákimshilik juwapkershilik haqqındaǵı kodeksine bir qatar qosımshalar hám ózgerisler kirgizilmekte. Atap aytqanda, avtotransport quralınıń basıp ótken aralıǵın kórsetetuǵın odometr úskenesiniń kórsetkishleri ózgertilgeni yamasa odometr úskenesi almastırılǵanı haqqında avtotransport quralın realizaciyalawdan aldın qarıydardı xabardar etpegenlik ushın juwapkershilik ilajları belgilenbekte. Sonıń ishinde, bunıń ushın juwapker bazalıq esaplaw muǵdarınıń 15 esesine shekemgi muǵdarda járiymaǵa tartılıwı usınıs etilmekte.
Dodalawlarda deputatlar nızam joybarında názerde tutılıp atırǵan normalardıń búgingi kúndegi áhmiyetin atap ótip, óz pikir-usınısların berdi.

ÓzA