Oliy Majlis Nızamshılıq palatasındaǵı Ózbekstan XDP frakciyasınıń gezektegi májilisinde bir qatar nızam joybarları hám parlamentlik qadaǵalawǵa baylanıslı máseleler kórip shıǵıldı.

Májiliste dáslep Prezidenttiń basshılıǵında bolıp ótken kámbaǵallıqtı qısqartıw hám xalıqtıń bántligin támiyinlew baǵdarındaǵı jumıslardıń juwmaǵı hám kelesi jıl ushın tiykarǵı wazıypalar boyınsha videoselektor májilisinde belgilep berilgen áhmiyetli wazıypalarǵa toqtap ótildi. Bul wazıypalardıń orınlanıwın támiyinlew, bul processte Xalıq demokratiyalıq partiyası deputatlıq korpusınıń belsene qatnasıwına erisiw máseleleri boyınsha pikir-usınıslar bildirildi.
Atap ótilgenindey, elimizde kámbaǵallıqtı qısqartıw, bántlikti támiyinlew, mútáj xalıq wákilleriniń máplerin qorǵaw baǵdarında bir qatar nátiyjelerge erisilmekte. Bul baǵdardaǵı jumıslardı dawam ettiriw xalıqtıń abadanlıǵın bunnan bılay da arttırıwda áhmiyetli orın iyeleydi.
Videoselektor májilisinde belgilengen wazıypalar partiyanıń baǵdarlamalıq maqsetlerine únles bolıp, olardıń ámelge asırılıwı partiya elektoratınıń máplerin qorǵawǵa xızmet etetuǵını atap ótildi. Sonıń ushın kámbaǵallıqtı qısqartıw hám xalıqtıń bántligin támiyinlew baǵdarındaǵı wazıypalardıń orınlanıwında jámiyetlik hám deputatlıq qadaǵalawdı kúsheytiw jáne real nátiyjeler ushın qatań hám ámeliy háreket etiw zárúr ekenligi aytıldı.
Dodalawlarda frakciya aǵzaları bul baǵdarda bir qatar pikir -usınıslardı bildirdi. Sonıń ishinde, deputat Sharofiddin Nazarov jumıs orınları ashılǵanı haqqındaǵı maǵlıwmatlardıń haqıyqatlıǵı máselesinde aymaqlarda deputatlıq qadaǵalawdı kúsheytiw, ásirese, bul baǵdarda xalıq deputatları jergilikli Keńeslerindegi partiya toparları menen turaqlı birge islesiw zárúrligin atap ótti.
Sonıń menen birge, juwapker uyımlar hám atqarıwshı hákimiyattıń kámbaǵallıqtı qısqartıw hám bántlikti támiyinlew baǵdarındaǵı juwapkershiligin kúsheytiw, partiya sistemasında orınlarda alıp barılıp atırǵan úyreniw processlerinde usı máselege ayrıqsha itibar qaratıw zárúrligi de aytıp ótildi.
Bunnan soń májiliste Ózbekstan Respublikası Milletleraralıq qatnasıqlar hám sırt eldegi watanlaslar máseleleri boyınsha komiteti baslıǵı K.Sarievtiń “Elimizde ulıwma milliy tatıwlıqtı támiyinlew tarawında ámelge asırılıp atırǵan jumıslar haqqında”ǵı málimlemesin tıńlaw haqqındaǵı másele kórip shıǵıldı.

ÓzA