“Ózbekstan – 2030” strategiyasında belgilengen wazıypalardı ámelge asırıw sheńberinde joqarı bilimlendiriwden keyingi bilimlendiriw sistemasın jetilistiriw mámleketlik siyasattıń tiykarǵı baǵdarı sıpatında belgilenbekte.

Keyingi jılları bul tarawda keń kólemli jumıslar ámelge asırıldı. Atap aytqanda, 2017-jıldaǵı 504 qabıllaw kvotasına salıstırǵanda joqarı bilimlendiriwden keyingi bilimlendiriw ushın ajıratılatuǵın kvotalar 10 esege arttırılıp, 2025-jıl ushın 5 250 hám 2026-jıl ushın 5 300 etip tastıyıqlandı.
Innovaciyalıq rawajlanıw agentligi málimleme xızmetiniń basshısı Muqaddas Fayozovanıń málim etiwinshe, joqarı bilimlendiriwden keyingi bilimlendiriw sistemasında kvotalardıń keńeytiliwi mámleketimiz ushın strategiyalıq áhmiyetke iye ilimiy tarawlardı rawajlandırıwǵa xızmet etpekte.
– 2026-jıl ushın ajıratılǵan 5 300 kvotanıń 60 procentin zamanagóy texnologiyalar, densawlıqtı saqlaw hám bioinnovaciyalar, energetika, awıl xojalıǵı jáne suw resursları hám qorshaǵan ortalıqtı qorǵaw sıyaqlı tiykarǵı baǵdarlarǵa baǵdarlaw jas ilimpazlar ushın mánzilli imkaniyatlardı keńeytpekte. Bul ilimiy potencialdı arttırıwda áhmiyetli faktor bolmaqta.
Sonıń menen birge, ilimiy hám bilimlendiriw shólkemlerinde joqarı bilimlendiriwden keyingi bilimlendiriw institutlarınıń qamtıp alıwı da sezilerli dárejede keńeydi. Eger 2017-jılı bunday institutlar 100 shólkemde jumıs alıp barǵan bolsa, 2025-jılı olardıń sanı 249 ǵa jetti. Bul bolsa 2,3 ese ósiwdi ańlatadı. Izleniwshilerdiń sanı da turaqlı artıp barmaqta, – dedi M.Fayozova.
2025-jıldıń tórtinshi shereginiń jaǵdayına bola, joqarı bilimlendiriwden keyingi bilimlendiriw sistemasında jámi 34 149 izleniwshi bilim almaqta. Sonnan 11 877 i doktoranturada (DSc – 722, PhD -11 155), 21 919 ı óz betinshe izleniwshilerde (DSc – 3 546, PhD -18 373), 353 i stajyor-izertlewshi sıpatında ilimiy jumıs alıp barmaqta.
Ámelge asırılıp atırǵan reformalar joqarı bilimlendiriwden keyingi bilimlendiriw sistemasın “Ózbekstan-2030” strategiyasında belgilengen maqsetler menen tolıq úylestirip, mámlekette jańa áwlad ilimiy kadrların tayarlaw procesin jáne de jedellestirmekte.

ÓzA