Búgin Oliy Majlis Nızamshılıq palatasındaǵı Ózbekstan Ekologiyalıq partiyası frakciyasınıń gezektegi májilisi bolıp ótti.

Onda dáslep usı jıldıń 19-noyabr kúni mámleket basshısınıń basshılıǵında ótken kámbaǵallıqtı qısqartıw hám xalıqtıń bántligin támiyinlew baǵdarındaǵı jumıslardıń juwmaǵı hám kelesi jıl ushın tiykarǵı wazıypalar boyınsha videoselektorda kóterilgen máseleler hár tárepleme dodalandı.
Frakciya basshısınıń orınbasarı Aybek Rahimov, deputat Nawrız Yusupov hám basqalar bul májiliste alǵa qoyılǵan baslamalar, belgilep berilgen wazıypalardı tán alıp, olardıń mámlekettiń turaqlı rawajlanıwı, xalıqtıń abadanlıǵın támiyinlewdegi áhmiyetine toqtap ótti.
– Videoselektor májilisinde usı jıldıń basınan berli jumıssızlıq 4,9 procentke túskeni, birinshi márte 1 mıń 435 máhálle “kámbaǵallıqtan jıraq” aymaqqa aylanǵanı ayrıqsha atap ótildi, – dedi N.Yusupov. Sonday-aq, mámleketimiz basshısı aldaǵı wazıypalarǵa ayrıqsha toqtap ótti. Sonıń ishinde, turizm potencialı joqarı 150 máhálleniń infrastrukturası jaqsılansa, bul jerlerde xızmetler kólemin 10 trillion sumǵa jetkeriw, 45 mıń adamdı sawda hám serviste bánt etiw múmkin ekenligi aytıldı. Usı maqsette kelesi jılı 150 máhálleniń hár birine infrastruktura ushın 3-5 milliard sumnan beriletuǵını málim etildi.
Bunnan tısqarı, xalıqtıń bántligine xızmet etetuǵın qurılıs, turizm, xızmetler tarawı, awıl xojalıǵı hám sanaat baǵdarlarında jańa imkaniyatlardı ashıw, usı baǵdarlarda jumıs orınların jaratıw máselelerine itibar qaratıldı. Bul májiliste belgilep berilgen wazıypalar xalıqtı jumıs penen bánt etiw hám dáramatqa iye bolıwına xızmet etedi, – dedi deputat.
Dodalawlarda atap ótilgenindey, kámbaǵallıqtı qısqartıw máselelerine baǵıshlanǵan bul májiliste belgilengen wazıypalardıń orınlanıwı ústinen deputatlıq qadaǵalawdı ornatıw zárúr. Bul baǵdarda Ekofrakciyanıń tiyisli ilajlar rejesi islep shıǵılǵanı atap ótildi.
Bunnan soń frakciya májilisiniń kún tártibindegi nızam joybarları qızǵın dodalandı.

ÓzA