Ózbekstan hám Qıtay arasında Strategiyalıq sóylesiw ushırasıwınıń protokolı hám keń kólemli birge islesiw baǵdarlamasına qol qoyıldı. Bul haqqında mámleketimiz sırtqı siyasat uyımınıń basshısı Baxtiyor Saidov sociallıq tarmaqtaǵı betinde málim etti.

Atap ótiliwinshe, keń kólemli sóylesiw jedel rawajlanıp atırǵan eki tárepleme kún tártibin tolıq qamtıp alǵan: siyasiy, ekonomikalıq sheriklik, sonıń ishinde, transport hám infrastruktura baylanısları, mádeniy almasıw, xalıqlarımız arasındaǵı doslıq baylanıslarına shekem.
Sonday-aq, tárepler hár qanday sharayatta strategiyalıq sheriklikti jáne de bekkemlew boyınsha qosımsha ilajlardı da dodalaǵan.
– Regionallıq hám globallıq kólemde tınıshlıq, turaqlılıq hám ulıwmalıq rawajlanıwdı támiyinlewge sadıqlıqtı jáne bir márte tastıyıqlap, tiykarǵı xalıqaralıq mashqalalarǵa ayrıqsha itibar qarattıq, – dep jazǵan Saidov.
– Búgingi ushırasıw juwmaǵı boyınsha Strategiyalıq qarım-qatnas ushırasıwınıń protokolı hám Ózbekstan hám Qıtay sırtqı isler ministrlikleri arasında keń kólemli birge islesiw baǵdarlaması – birgeliktegi keleshektegi háreketlerimizge baǵdar beretuǵın hám qollap-quwatlaytuǵın áhmiyetli hújjetlerge qol qoydıq.

G.Sattorova, ÓzA