Bárshemizge málim, suwıq kúnler kirip keliwi menen puqaralardıń jıllılıqqa bolǵan talabı artıp, usınday waqıtları ısıtıw tarmaqlarınıń jılıtıw máwsimine sazlıǵı jáne bir márte kózden ótkeriliwi zárúr sanaladı.

«Hududgaz Qaraqalpaqstan» gaz támiynatı filialı xızmetkerleri tárepinen jılıtıw máwsimi aldınan xalıq arasında tábiyǵıy gazden durıs paydalanıw, gazdiń záhárli iyisinen zıyanlanıwdıń aldın alıw boyınsha úgit-násiyat jumısları turaqlı túrde ámelge asırılıp kelinbekte. Olar respublikamızdıń barlıq aymaqlarında xalıq penen ushırasıp, joqarı oqıw orınları, mákemeler menen kárxanalarda, adam kóp jıynalatuǵın orınlarda úgit-násiyat jumısların alıp barmaqta.
Onda tiykarınan, ısıtıw qazanxanaları hám onıń morılarınıń sazlıǵına, olardı túrli buyım hám basqa da zatlar menen bekitpewge, sonday-aq arnawlı morı tazalawshı shólkemler tárepinen óz waqtında tazalatıwǵa itibar qaratıp, tábiyǵıy gazden durıs paydalanıw gazdiń záhárli iyisinen zıyanlanıwdıń aldın alıw ushın ápiwayı qaǵıydalarǵa ámel etiw talap etilmekte.
– Sonday-aq, qoldan jasalǵan hám nasaz gaz úskenelerinen paydalanbawdı, túngi waqıtları katyol, pechlerdi qadaǵalawsız qaldırmawdı, asxanada ornatılǵan tábiyǵıy gaz benen islewshi gaz plitalarınan xanını ısıtıw ushın paydalanbawdı, gaz úskenelerin ornatıw tártip qaǵıydalarına ámel etiwdi hám olarǵa rezina shlangalar arqalı jalǵawǵa jol qoymay, xananı jılıtıwda ashıq ottan paydalanbawdı usınıs etilmekte. Gazdiń záhárli iyisinen zıyanlanıw hám kelip shıǵıwı múmkin bolǵan órtlerden zıyan kóriw sebeplerin anıq mısallar menen túsindirmekte, – deydi «Hududgaz Qaraqalpaqstan» gaz támiynatı filialınıń bólim baslıǵı Ájiniyaz Amanbaev.
Bul baǵdardaǵı úgit-násiyat ilajları orınlarda dawam etpekte.

Á.Jiyemuratov,
Qaraqalpaqstan xabar agentligi