Energetika ministrligi málimleme xızmetiniń xabar beriwinshe, Almatı qalasında Ózbekstan, Qazaqstan hám Qırǵızstannıń energetika hám suw xojalıǵı tarawları basshılarınıń qatnasıwında úsh tárepleme ushırasıw bolıp ótti.

Májiliste Ózbekstan Respublikası energetika ministri Jwrabek Mirzamahmudov, suw xojalıǵı ministri Shavkat Hamroev, Qazaqstan Respublikası Energetika ministri Erlan Akkenjenov, suw resursları hám irrigaciya ministri Nurjan Nurjigitov hám Qırǵızstan Respublikası Energetika ministri Taalaybek Ibrayev, sonday-aq, mámlekettiń suw resursları, awıl xojalıǵı hám qayta islew sanaatı ministriniń orınbasarı Almaz Jeenaliev qatnastı.
Sóylesiwler waqtında regionnıń suw-energetika sistemasınıń turaqlılıǵı, máwsimlik júklemelerdi muwapıqlastırıw hám óz-ara járdem mexanizmlerin bunnan bılay da jetilistiriw máseleleri keńnen dodalandı. Sonıń ishinde, Toqtaǵul suw saqlaǵıshındaǵı qıyın jaǵdaydı esapqa alǵan halda, ushırasıw qatnasıwshıları óz-ara elektr energiyasın jetkerip beriw arqalı bir-birin qollap-quwatlaw, ısıtıw máwsimin tabıslı ótkeriw hám kelesi vegetaciya máwsimine tayarlıq kóriw ushın birgeliktegi háreketlerdi muwapıqlastırıwǵa kelisip aldı.
Qazaqstan hám Ózbekstannıń gúzgi-qısqı máwsimde Qırǵızstanǵa elektr energiyasın jetkerip beriwge tayar ekenligi jáne bir márte tastıyıqlandı. Bul, óz gezeginde, Qırǵızstanǵa qıs dawamında elektr energiyasın islep shıǵarıw kólemin qısqartıw imkaniyatın beredi hám Toqtaǵul suw saqlaǵıshında zárúr bolǵan suw muǵdarın toplawǵa sharayat jaratadı. Toplanǵan suw rezervi keyin ala Qazaqstan hám Ózbekstannıń awıl xojalıǵı jerlerin vegetaciya dáwirinde turaqlı suwǵarıwǵa xızmet etedi.
Ushırasıwda, sonday-aq, regionda energiya tutınıwın optimallastırıw, únemlewdi arttırıw hám nátiyjelilikti támiyinlew boyınsha birgeliktegi ámeliy ilajlardı jolǵa qoyıw máselesine de kelisip alındı. Ministrler birge islesiw “jaqın qońsıshılıq” ruwxında ámelge asırılıp atırǵanın atap ótip, Oraylıq Aziyada energiya qáwipsizligin bekkemlew barlıq qatnasıwshı mámleketler ushın tiykarǵı wazıypa ekenin atap ótti.
Májilis juwmaǵında tárepler 2026-jıl vegetaciya máwsimi ushın qısqı elektr energiyasın jetkerip beriw hám suwdı toplaw kólemlerin huqıqıy jaqtan bekkemlewshi úsh tárepleme protokolǵa qol qoydı.

ÓzA