Berdaq atındaǵı Qaraqalpaq mámleketlik universitetinde professor Alima Karlıbaevna Berdimuratovanıń 60 jıllıq yubileyine baǵıshlap «Ekologiyalıq qáwipsizlik hám onıń globallıq qáwipsizlik sistemasındaǵı ornınıń filosofiyalıq-metodologiyalıq analizi» atamasındaǵı respublikalıq ilimiy-teoriyalıq konferenciya bolıp ótti.

Konferenciyanı universitet rektorı wazıypasın waqıtsha atqarıwshı O.Duysenbaev basqarıp bardı.
Ilajda Qaraqalpaqstan Respublikası Joqarǵı Keńesiniń komitet baslıǵı M.Atamuratov, senator O.Ataniyazova joqarı oqıw orınlarınıń professor-oqıtıwshıları hám keń jámiyetshilik wákilleri qatnastı.
Ilajda sózge shıqqanlar tárepinen professor Alima Karlıbaevnanıń ilimiy jolı, filosofiya hám metodologiya tarawındaǵı xızmetleri, jas kadrlar tayarlawǵa qosqan salmaqlı úlesi ayrıqsha atap ótildi. Sonday-aq, onıń búgingi kúndegi ilimiy mektebi, ilimpaz shákirtleri tárepinen alıp barılıp atırǵan izlenisler hám jetiskenlikler de kórsetildi. Ustazdıń respublikalıq hám xalıqaralıq ilimiy jámiyetshiliktegi ornı, filosofiya tarawındaǵı teoriyalıq hám ámeliy qollanbaları, alıp barǵan izertlewleri ilimiy jámiyetshilik tárepinen joqarı bahalandı.
Ilaj dawamında Qaraqalpaqstan Respublikası Joqarǵı Keńesi Prezidiumınıń qararına muwapıq Alima Berdimuratova «Watan pidayısı» kókirek belgisi menen sıylıqlandı.
Alima Berdimuratova 1987-jılı Moskva mámleketlik universitetiniń filosofiya fakultetin tamamlaǵannan soń, óziniń ilimiy izlenislerin alıp barıp kandidatlıq dissertaciyasın 1993-jılı 17-fevralda Moskva mámleketlik universiteti filosofiya fakultetindegi qánigelestirilgen ilimiy keńeste tabıslı qorǵaydı. Al, doktorlıq dissertaciyasın bolsa, 2000-jıldıń 26-fevral kúni Ózbekstan Respublikası Ilimler akademiyası Filosofiya hám huqıq institutı janındaǵı ilim doktorı ilimiy dárejesin beriwshi qánigelestirilgen keńeste «Filosofsko-metodologicheskie problemı sovremennoy ekologicheskoy situacii (na materialax Priaralya)» atamasında 09.00.01 – Dialektika hám biliw teoriyası qánigeligi boyınsha tabıslı jaqlaǵan.
Ol óz izertlewlerinde jámiyettiń rawajlanıwı, ruwxıy qádiriyatlar, jaslardıń intellektuallıq rawajlanıwı sıyaqlı áhmiyetli máselelerge filosofiyalıq qatnastı alǵa qoyıp kelmekte. Alima Berdimuratova tárepinen alıp barılǵan ilimiy izleniwler tek teoriyalıq jaqtan emes, al ámeliy turmısta da óz sáwleleniwin tapqan. Ilimpazdıń basshılıǵında qorǵalǵan ilimiy jumıslarda milliy oy-pikir, zamanagóy kózqaras hám pedagogikalıq sheberlik únles halda sáwlelendirilgen. Shákirtleri bolsa, búgin mámleketimizdiń túrli tarawlarında tabıslı jumıs alıp barıp, ustazdıń atın maqtanısh penen tilge aladı. Professordıń ilimiy miyrası keń kólemli shıǵarmalar, maqalalar, monografiyalar hám ilimiy izertlewler arqalı óz kórinisin tapqan. Onıń jazǵan shıǵarmaları búgingi kúni kóplegen student hám izertlewshiler ushın qunlı derek sıpatında xızmet etpekte.
Házirgi waqıtta Alima Berdimuratova Qaraqalpaq mámleketlik universiteti “Sociallıq pánler” kafedrası baslıǵı lawazımında óziniń kóp jıllıq tájiriybesi menen jaslarǵa ustazlıq etip kelmekte.

Qaraqalpaqstan xabar agentligi