Saudiya Arabstanınıń paytaxtı Ar-Riyad qalasında bolıp ótken VI Islam tilekleslik oyınlarında mámleketimizdiń sport delegaciyası ulıwma 96 medal, sonnan 29 altın, 35 gúmis hám 32 qola medalların qolǵa kirgizip, ulıwma komandalıq esapta 57 mámleket arasında ekinshi orındı iyelewge miyasar boldı.

Quwanıshlı tárepi, elimiz sportshılarınıń bunday joqarı nátiyjege erisiwinde Ózbekstan saylandı komandası quramında qatnasqan respublikamız wákillerinen boksshi Madiyar Daniyarov, hayal-qızlar gúresi boyınsha palwan Aqtenge Kewnimjaevalar altın, sablyashılardan Gúlistan Perdebaeva, Zaynab Dayıbekova, Musa Aytmuratov hám Islam Abdazovlardıń gúmis medalları menen ózleriniń salmaqlı úleslerin qostı. Sonı aytıp ótiwimiz kerek, mámleketimiz sport delegaciyası 2022-jılı Túrkiyanıń Konya qalasında ótkerilgen V Islam tilekleslik oyınlarında da túrkiyalı sportshılardan soń ekinshi orındı iyelegen edi.
Sportshılarımızdı erisken bul úlken tabısı menen qutlıqlap, olardıń aldaǵı jarıslarda da joqarı kórsetkishlerdi qolǵa kirgiziwine tilekleslik bildirip qalamız!

Adilbay Orazov,
Qaraqalpaqstan xabar agentligi sholıwshısı.