Xojeli tek ǵana respublikamızda emes al, Ózbekstanda óndiris, sawda, isbilermenlik hám áyyemgi tariyxıy orınları menen belgili rayon. Jaqında Húrmetli Prezidentimiz tárepinen Qaraqalpaqstan ushın jáne bir úlken áhmiyetli qararı qabıl etilip, usı qarar tiykarında rayonda “Jaslar sociallıq ekonomikalıq orayı”n qurıw belgilengen edi. Biz rayonnıń rawajlanıw jolı, xalıqtıń sociallıq-ekonomikalıq jaǵdayı, turizm potencialı hám jańa joybar tiykarında ámelge asırılıp atırǵan jumıslar haqqında Xojeli rayonı hákimi Ermashev Jengis Maratovich penen sáwbetlesken edik.

– Jengis Maratovich, sáwbetimizdi rayonnıń házirgi waqıttaǵı tiykarǵı jetiskenlikleri hám rawajlanıw jolları haqqında baslasaq. Sońǵı waqıtlarda rayonda qaysı tarawlarda úlken ózgerisler bolmaqta?
– Haqıyqatında da, tariyxı bir neshe mıń jıllar menen baylanıslı bolǵan Xojeli búgingi dáwirde de zaman menen teńdey qádem taslap, aydın keleshekke qaray rawajlanıp baratırǵan rayon esaplanadı.
Húrmetli Jurtbasshımızdıń Qarar hám Pármanları tiykarında respublikamızdıń barlıq orınları qatarında biziń rayonımızda da keń kólemli qurılıs-ońlaw, abadanlastırıw jumısları alıp barılıp, rayon turǵınlarınıń abadan turmıs keshiriwi ushın qolaylı sharayatlar jaratılmaqta.
Rayonda usı 2025-jıldıń 10 ayı dawamında social-ekonomikalıq kórsetkishlerdi tarawlar kesiminde sońǵı 5 jıl menen salıstırǵanda:
Byudjet túsimi 2020-jılı 53,4 mlrd. sumdı quraǵan bolsa, bul kórsetkish bıyılǵa kelip 65,5 mlrd. sumǵa jetkerildi (+12,1 mlrd. sum).
Sanaat ónimlerin islep shıǵarıw 2020-jılı 367,2 mlrd. sumdı quraǵan bolsa, bul kórsetkish usı jılıń 10 ayı dawamında 563,6 mlrd. sumǵa jetkerildi (+196,4,6 mlrd. sum, ósim 153,5%).
Investiciya tarawında 2020-jılı 124,8 mlrd. sumlıq joybarlar ámelge asırılǵan bolsa, usı jıldıń 10 ayı dawamında 204,2 mlrd. sumǵa jetkerildi (+79,4 mlrd. sum, ósim 163,2%).
Eksport kórsetkishi 2020-jılı 2,6 mln. AQSh dollardı quraǵan bolsa, bıyılǵa kelip bul kórsetkish 5,1 mln. AQSh dollarǵa jetkerildi
(+2,5 mln. AQSh dollar).
Xızmet kórsetiw tarawı 2020-jılı 288,8 mlrd. sumdı quraǵan bolsa, usı jıldıń 10 ayı dawamında bul kórsetkish 686,8 mlrd. sumǵa jetkerildi (+398 mlrd. sum, ósim 237,8%).
Qurılıs tarawında 2020-jılı 147,7 mlrd. sumlıq jumıslar ámelge asırılǵan bolsa, usı jıldıń 10 ayı dawamında 265,1 mlrd. sumǵa jetkerildi (+117,4 mlrd. sum, ósim 179,5%).
Awıl xojalıǵı tarawında 2020-jılı 487,2 mlrd. sumlıq ónim jetistirilgen bolsa, bul kórsetkish usı jıldıń 10 ayı dawamında
653,1 mlrd. sumǵa jetkerildi (+165,9 mlrd. sum, ósim 134,1%).
Bul kórsetkishlerdi mısal retinde aytatuǵın bolsaq, jergilikli sanaattı rawajlandırıw maqsetinde Nawrız MPJda Ándijanlı isbilermen menen birgelikte joybar summası 8,3 mlrd. sum bolǵan
ayaq-kiyim islep shıǵarıwshı “Do‘stlar shoes Xo‘jayli”JShJ iske túsirilip 150 den artıq jańa jumıs orınları jaratıldı hám islep shıǵarılǵan ónimler házirgi kúnde ishki bazardı támiyinlep kelmekte.
Sonday-aq, Qazaqstan Respublikasınan alıp kelinetuǵın biydaydı qayta islep, un ónimin shıǵarıwǵa qánigelestirilgen Sarıshúngil APJda proekt summası 14,2 mlrd. sum bolǵan “Xojeli un mahsulotlari” JShJ hám Kún nurı MPJda joybar summası 8,1 mlrd. sum bolǵan
“United Kapital” JK iske túsiriliwi nátiyjesinde jámi 80 jańa jumıs ornı jarıtıldı hám kárxanalar tárepinen tayarlanǵan un ónimi ishki bazardı tolıq támiyinlew menen birge búgingi kúnde Awǵanstan Respublikasına eksport qılınbaqta.
Bul álbette, Prezidentimizdiń Qaraqalpaqstan Respublikasına degen ayrıqsha itibarınıń nátiyjesi bolıp, bunday ǵamxorlıq ushın Prezidentimizge minnetdarshılıq bildiremiz!
– Jol, suw, elektr energiyası hám tábiyǵıy gaz támiynatı menen baylanıslı máseleler qalay sheshilmekte? Qurılıs hám abadanlastırıw islerine de toqtap ótseńiz.
– Puqaralardıń kúndelikli turmıs shárayatı menen baylanıslı bolǵan jol, suw, elektr energiyası hám tábiyǵıy gaz máseleleri de belgilengen rejeler tiykarında qanaatlandırılıp kelinbekte.
Ministrler Kabinetiniń 2024-jıl 11-oktyabrdegi “Qalalar hám basqa da elatlı punktler kósheleri hám de ishki xojalıq jolları infrastrukturasın jáne de jetilistiriw haqqında”ǵı qararı tiykarında rayonnıń 15,7 km ishki jolların ońlaw hám qum-shaǵıl tas aralaspasın (ЩPS) tósew jumıslarına jámi 4 mlrd. sum qarjı ajıratılıp, búgingi kúnde bul jumıslar tolıq ámelge asırıldı.
Prezidentimizdiń 2024-jıl 24-dekabrdegi “2025-2027-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında”ǵı qararı tiykarında
6 mlrd. sum qarjı esabınan “Nókis-Xojeli” avtomobil jolınıń
6-11-km aralıǵına asfalt qaplamasın tósew hám joldı rekonstrukciya islew jumısları ámelge asırıldı.
Elektr energiya tarmaǵın jaqsılaw hám gúz-qıs máwsimine tayarlıq kóriw boyınsha rayonda jámi 750,0 mln. sumlıq, atap aytqanda, 250 dana elektr tayanısh baǵanaların almastırıw, 131,2 km hawa elektr uzatıw liniyaların hám 55 dana transformatorda iri ońlaw, 89 dana transformatorda hám 243,5 km hawa elektr uzatıw liniyalarında kishi ońlaw jumısları alıp barıldı.
Sonıń menen birge, Jurtbasshımızdıń 2025-jıl 23-sentyabrdegi “Kámbaǵallıqtan abadanlıqqa qaray” baǵdarlamasın ámelge asırıw boyınsha birinshi dárejeli ilajlar haqqında”ǵı qararı tiykarında
5,1 mlrd. sum qarjı esabınan Kún nurı, Shaǵalakól, Samankól, Qumjıqqın, Sarıshúngil hám Ámiwdárya máhálle aymaqlarında 1 010 dana temir beton baǵanaları, 25,9 km SIP kabel hám 7 dana transformator ornatıw jumısları ámelge asırıldı, nátiyjede 7 mıńnan aslam shańaraqlarda elektr energiya sapası jaqsılandı.
Búgingi kúnde rayonda jámi 25 281 tutınıwshı bolıp, sonnan,
97 procenti (24 513 xojalıq) tábiyǵıy gaz benen, al 3 procenti (768 xojalıq) suyıltırılǵan gaz benen támiyinlengen.
Sonday-aq, Párwaz, Nawrız, Mádeniyat, Nurlı jol, Qırqınshı máhállelerinde 1 335 xojalıqtı eki basqarıwshı sistemaǵa ótkeriw jumısları rejelestirilgen bolıp, sonnan búgingi kúnde 1 801 xojalıqta regulyator ornatıw jumısları ámelge asırıldı. (reje +135 procent)
Qurılıs hám abadanlastırıw jumısları haqqında qısqasha aytatuǵın bolsaq, Prezidentimizdiń 2023-jıl 25-dekabrdegi
“2024-2026-jıllarda Ózbekstan Respublikasınıń sociallıq hám islep shıǵarıw infrastrukturasın rawajlandırıw ilajları haqqında”ǵı qararı tiykarında rayonda jámi 72,1 mlrd. sumlıq
7 obektte qurılıs jumısların alıp barıw belgilendi. Búgingi kúnde sociallıq obektlerdi qurıw, avtomobil jollarına qara qaplamalı asfalt tósew hám jap-salmalardı betonlaw jumısları óz waqtında sapalı ámelge asırıldı.
Jáne de, Prezidentimizdiń 2023-jıl 30-marttaǵı Qaraqalpaqstanǵa bolǵan saparı dawamında berilgen tapsırmalardıń orınlanıwın támiyinlew maqsetinde Jańa jap APJda 4,6 mlrd sumlıq 150 orınǵa mólsherlengen jańadan mektepke shekemgi bilimlendiriw shólkemi qurılıp, paydalanıwǵa tapsırıldı.
Jurtbasshımızdıń 2022-jıl 25-oktyabrdegi “Jámiyetlik pikir tiykarında qáliplestiriletuǵın joybarlardı qarjılandırıw kólemin keńeytiw ilajları haqqında”ǵı qararına muwapıq puqaralardıń belsendiligi menen usı jıldıń I hám II máwsimde jámi
17 joybarǵa 23,3 mlrd. sum qarjı ajıratılıp, búgingi kúnde qurılıs jumısları ámelge asırılmaqta.
Bunnan tısqarı, Prezidentimizdiń 2025-jıl 21-apreldegi “2025-jıl ushın menshiklestiriw baǵdarlaması haqqında”ǵı pármanı tiykarında rayonda jámi 4 dana kóp kvartiralı, 206 shańaraq ushın mólsherlengen turaq jay qurıw reje etip alınıp, olar Abat MPJda 121 shańaraq ushın mólsherlengen 7 qabatlı
1 hám 45 shańaraq ushın mólsherlengen 5 qabatlı
1, Mádeniyat MPJda 40 shańaraqqa mólsherlengen 5 qabattan ibarat
2 kóp qabatlı turaq jaylardıń qurılıwı rejelestirilgen.
– Rayonda kishi biznes hám isbilermenlikti rawajlandırıw ushın qanday sharayatlar jaratılǵan? Jas isbilermenlerdi qollap-quwatlaw hám jaslar ushın jumıs orınların jaratıw hám olardıń bántligin támiyinlew boyınsha islenip atırǵan jumıslarǵa da toqtap ótseńiz.
– Búgingi kúnde isbilermenlerdi qollap-quwatlaw maqsetinde Prezidentimizdiń 2022-jıldaǵı 31-avgusttaǵı “Qaraqalpaqstan Respublikasında isbilermenlik, innovaciyalıq texnologiyalar hám infrastrukturalardı jedel rawajlandırıw arqalı xalıqtıń abadanlıǵın arttırıwdıń qosımsha ilajları haqqında”ǵı Pármanı tiykarında isbilermenlerdiń dáramat hám aylanba salıqlarınan 50 procentlik jeńillikler berilgen bolıp, jańadan mámleketlik dizimnen ótken isbilermenlerge dizimnen ótken ayı ushın belgilengen salıqtan bir aylıq jeńillik berilgen. Bul jeńilliklerden rayonımız isbilermenleri nátiyjeli paydalanbaqta.
Sonday-aq, jas isbilermenlerdi qollap-quwatlaw maqsetinde, Prezidentimizdiń basshılıǵında 2025-jıl 14-fevralda sáwbet kórinisinde jaslar menen ótkerilgen videoselektor májilisinde jas isbilermenler ushın jańa dáwirdi baslap beriwshi 3 úlken áhmiyetli qarar qabıl etildi:
“Jaslar isbilermenligin hám olardıń bántligin támiyinlewge qaratılǵan biznes joybarlardı qollap-quwatlaw sistemasın jetilistiriw ilajları haqqında”ǵı qararı tiykarında, “Jaslar isbilermenligin rawajlandırıw mámleketlik maqsetli fondı” shólkemlestiriliwi belgilenip, isbilermenligin baslap atırǵan hám milliy yamasa xalıqaralıq C1 dárejedegi shet tiline sertifikatı bar jaslarǵa shetki aymaqlarda shet tili qayta tayarlaw kursların (repetitor) shólkemlestiriw ushın ssuda kórinisinde 3 jıl múddetke qarjı ajıratılıwı belgilengen. Bul qarar tiykarında búgingi kúnde Xojeli rayonınan 11 jasqa jámi 1,5 mlrd. sumlıq kredit hám 1 jasımızǵa 130 mln. sum ssuda qarjıların ajıratıw ushın arzaları tayarlanıp, tiyisli hújjetler fondqa jiberildi.
“Joqarı bilimlendiriw shólkemleri pitkeriwshileriniń jumısqa ornalasıwına kómeklesiw boyınsha qosımsha ilajlar haqqında”ǵı qararı tiykarında, joqarı oqıw orınları pitkeriwshileriniń bántligin támiyinlew maqsetinde rayonımızǵa Milliy bank biriktirilgen bolıp, bul bank tárepinen rayondaǵı 18 jasqa 545 mln. sumlıq jeńilletilgen kreditler ajıratıldı.
“Jaslar isbilermenligin rawajlandırıw hám bántligin támiynilewge baylanıslı qosımsha ilajlar haqqında”ǵı
qararı tiykarında “Aloqa” bank “Jaslar tayanısh banki” dep járiyalanıp, rayonda ózin bánt etip, isbilermenlikti jolǵa qoyıp atırǵan 85 jasqa jámi 5,6 mlrd. sumlıq jeńilletilgen kredit ajıratıldı.
– Rayondı sociallıq-ekonomikalıq jaqtan rawajlandırıw boyınsha Buxara wálayatınıń qáwenderligine bekitiligenli berli qanday ilajlar alıp barıldı? Wálayat tárepinen rayon xalqınıń turmıs jaǵdayın jaqsılaw boyınsha neler islendi?
– Hurmetli Prezidentimizdiń Qaraqalpaqstanǵa ayrıqsha itibarı hám ǵamxorlıǵınıń bir dálili sıpatında qabıl etilgen qararına muwapıq, Buxara wálayatı Xojeli rayonına biriktildi. Usı qarar boyınsha rayonımızda kólemli jumıslar ámelge asırıldı.
Atap aytqanda, Ministrler Kabinetiniń 2023-jıl 2-fevraldaǵı “Qaraqalpaqstan Respublikasında xalıq ushın múnásip turmıs sharayatların jaratıw hám máhálleler infrastrukturasın bunnan bılay da jaqsılaw ilajları haqqında”ǵı qararına muwapıq, rayondaǵı sociallıq qorǵawǵa mútáj 635 shańaraqtıń turaq jayınıń tóbesi shiferlap berilgen bolsa, 27 turaq jay jańadan qurıp berildi.
Buxara wálayatı hákimliginiń baslaması menen rayonımızdaǵı Oraylıq stadionǵa jámi 5 mlrd. sum qarjı ajıratılıp, stadionda úlken kólemli qurılıs-ońlaw jumısları ámelge asırıldı. Nátiyjede, 2 mıńnan aslam tamashagóy sıyımlılıǵına iye bolǵan zamanagóy kórinistegi stadion qurılıp, usı jıldıń 1-noyabr kúni paydalanıwǵa tapsırıldı.
Usı kúnlerde bolsa, rayonımızda xalıqtıń salamatlıǵın saqlaw hám olarǵa medicinalıq járdem kórsetiw boyınsha 3-30-noyabr kúnleri “Medicinalıq kórikten ótiń hám ózińizge salamat turmıs tárizin sawǵa etiń” atamasında salamatlıq aylıǵı ótkerilmekte hám bul joybarǵa Buxara wálayatı medicina birlespesiniń tájriybeli shıpakerleri qatnasıp, rayon xalqına medicinalıq járdem kórsetpekte. Bul processte puqaralar skrining tekseriwden ótkerilip, keselliklerdiń erte anıqlaw hám olardı emlep, biypul operaciyalar islenbekte.
– Kem támiyinlengen shańaraqlardı qollap-quwatlaw boyınsha qanday ilajlar alıp barılmaqta?
– Rayonlıq “Insan” sociallıq xızmetler orayı tárepinen hár bir shańaraqtıń jaǵdayı, olardıń sociallıq mútájlikleri hám járdemge bolǵan talabı úyrenilip, nátiyjede rayon aymaǵınan 8 292 puqaraǵa ámeliy járdemler kórsetiliwi belgilendi.
Usı jıl 1-noyabr jaǵdayına kóre, “Insan” sociallıq xızmetler orayı tárepinen xalıqtıń 12 kategoriyadaǵı qatlamına 94 túrdegi sociallıq xızmetler kórsetildi.
Atap aytqanda, kem támiyinlengen, mayıplıǵı bolǵan hám sociallıq qorǵawǵa mútáj bolǵanlarǵa “Saxawat hám kómek” fondı esabınan
168 puqaraǵa jámi 168,3 mln. sumlıq járdem kórsetildi.
– Prezidentimiz tárepinen jaqında Qaraqalpaqstan ushın jáne bir úlken áhmiyetli qarar qabıl etilip, usı qarar tiykarında Xojeli rayonında «Jaslar sociallıq-ekonomikalıq orayı»n qurıw belgilendi. Qurılıs isleriniń barısı qanday hám bul jerde qanday imkaniyatlar jaratıladı. Sonday-aq, bunday iri joybar ne ushın áyne Xojeli rayonında qurılıw belgilengen?
– Prezidentimizdiń 2025-jıl 3-noyabrde “Qaraqalpaqstan Respublikasında tikkeley sırt el investiciyaların tartıw esabınan “Jaslar sociallıq-ekonomikalıq orayın qurıw ilajları haqqında”ǵı qararı qabıl etildi. Jurtbasshımızdıń bul úlken áhmiyetli qararı tiykarında rayonımızdaǵı Samankól APJ aymaǵınıń 152 gektar jer maydanında shólkemlestirilip atırǵan “Jaslar sociallıq-ekonomikalıq orayı”nda qurılıs jumısların alıp barıw ushın Qıtay Xalıq Respublikasınıń “Everprosper Investment & Cunsulting Co. Ltd” kompaniyası tańlap alınıp, oraydı qurıw ushın 2026-2030-jılları Investor tárepinen 400 million AQSh dolları muǵdarında tuwrıdan-tuwrı sırt el investiciyaların kirgiziw belgilendi. Sonday-aq, qarar tiykarında oraydıń infrastrukturası ushın respublika byudjeti qarjıları esabınan 10 jıl múddetke 1 trillion sum muǵdarında byudjet ssudası ajıratılmaqta hám búgingi kúnde qurılıs jumısları baslanıw aldında.
Bul oraydı iske túsiriw nátiyjesinde 5 mıńnan aslam jańa jumıs orınları shólkemlestirilip, jaslarımızdıń bántligi támiyinlenedi.
Qararǵa muwapıq mámleketlik uyım sıpatında shólkemlestirilip atırǵan “Jaslar sociallıq-ekonomikalıq orayı ofisi” imáratı qurıldı. Sonday-aq, aymaqta qurılıs materialların islep shıǵarıw ushın zárúr bolǵan cement-beton zavodları iske túsirildi.
Bul úlken joybar tiykarında aymaqta IT universitet, startaplar texnoparki hám olardı qollap-quwatlaw innovaciyalıq toparları, jaslar bántligin támiyinlewge qaratılǵan islep shıǵarıw kárxanaları jumısı jolǵa qoyıladı.
Qurıp paydalanıwǵa tapsırılǵan sociallıq taraw obektleri investor tárepinen mámleketlik uyımlarǵa biyǵárez ótkerip beriledi.
Sonday-aq, bul Oray: – bilimlendiriw hám tájiriybe arttırıw tarawında zamanagóy kásiplerdi qısqa múddetli oqıw kursları arqalı iyelew hám miynet bazarı talaplarına sáykes kónlikpelerdi qáliplestiriw;
– isbilermenlikti rawajlandırıw tarawında jas isbilermenler ushın grantlar hám subsidiyalar haqqında maǵlıwmat hám ámeliy járdem kórsetiw, biznes-reje dúziw, joybardı baslaw hám rawajlandırıw boyınsha másláhátler beriw;
– sociallıq belsendilik hám volontyorlıq tarawında jaslardıń jámiyettegi belsendiligin arttırıw ushın volontyorlıq baǵdarlamalar, hár qıylı sociallıq joybarlar hám ilajlarda qatnasıw imkaniyatına iye bolıw, jaslardıń baslamaların ámelge asırıw ushın joybarlar tańlawın hám forumlar shólkemlestiriw;
– bántlik hám jumıs penen támiyinlew tarawında jaslar ushın vakanciyalar hám ámeliyat orınları haqqında maǵlıwmat beriw, jumısqa jaylasıwǵa kómeklesiw, jumıs beriwshiler menen ushırasıwlar hám yarmarkalar shólkemlestiriw;
– psixologiyalıq hám huqıqıy járdem beriw tarawında jaslar ushın biypul psixologiyalıq hám huqıqıy másláhátler beriw, huqıqıy mádeniyattı arttırıw boyınsha kurslar shólkemlestiriw;
– informaciya hám kommunikaciya tarawında jaslar ushın áhmiyetli bolǵan temalardıń málimleme maydanshasın jaratıw, internet hám kompyuterlerden biypul paydalanıw, jaslar arasında ekonomikalıq sawatlılıqtı arttırıw imkaniyatları jaratıladı.
Tariyxqa kóz juwırtatuǵın bolsaq, Xojeli Ullı jipek jolınıń dárbentinde jaylasqan aymaq. Bul aymaqtan erte dáwirlerde sawda kárwanları ótken. Házirgi waqıtta da usı dárbent jolda óziniń rawajlanıw jolı hám baǵdarına iye bolǵan Xojelide usı úlken joybardı ámelge asırıw belgilenip alınǵan. Bul respublikada barlıq orınlar úyrenilip, maqul dep qabıl etilgennen soń baslanıp atırǵan joybar esaplanadı. Húrmetli Prezidentimizdiń ayrıqsha itibarı menen Xojeli keleshekte jaslar hám rawajlanıwlar qalasına aylanıwı kútilmekte.
– Mine, eki jıldan berli xalıqaralıq shólkemler tárepinen rayondaǵı tariyxıy orınlardı abadanlastırıw hám qayta tiklew boyınsha ánjumanlar ótkerilip kelinbekte. Bul xalıqaralıq ánjumanlardıń nátiyjesinde rayonda turistler ushın jańa “vizit kartochkası” qáliplestiriliwi múmkin be?
– Álbette. Xojeli rayonında jaylasqan ashıq aspan astındaǵı eki mıń bes júz jıllıq tariyxqa iye Mizdaqxan kompleksindegi tariyxı
b.e.sh III ásirden baslanatuǵın Gáwir qala, XII-XIII ásirlerde qurılǵan “Mazlumxan sulıw” “Erejep Xalifa”, “Shamun Nabiy” “Jomart qassap”, “Qırıq shopan” estelikleri dúnya alımları hám turistleriniń itibarın tartpaqta.
Bul tariyxıy orınlarǵa turistler aǵımın asırıw ushın bir qatar kólemli jumıslar ámelge asırıldı. Atap aytqanda, 2024-jıl 17-18-may kúnleri rayonda “Mizdaqxan muqaddes hám sırlı mákan” atamasında xalıqaralıq festival ótkerildi. Ilaj Tashkent mámleketlik ekonomikalıq universiteti tárepinen Qaraqalpaqstan Respublikası Turizm basqarması hám rayonı hákimligi menen birgelikte shólkemlestirildi.
Festival sheńberinde “Mádeniy xabardarlıqtı arttırıw hám ekologiyalıq turaqlı turizmdi rawajlandırıw” atamasında xalıqaralıq ilimiy-ámeliy konferenciyası bolıp ótti. Konferenciyaǵa AQSh, Qubla Koreya, Irlandiya, Túrkiya hám basqa da mámleketlerden ekspertler, ilimpazlar qatnastı.
Bul festival hám konferenciya 2025-jıl 23-24-may kúnleri aralıǵında da shólkemlestirilip, bıyılǵı konferenciyaǵa Túrkiya, Hindstan, AQSh, Filippin mámleketlerinen tariyxshı alımlar qatnastı. Festivalǵa jıldan jılǵa qatnasıwshı mámleketlerdiń sanınıń artıp barıwı bul biziń tariyxımızdıń baylıǵı hám shet el alımlarınıń qızıǵıwshılıǵınıń artıwınan bir dálil desek boladı.
Bul orındaǵı tariyxıy maqbaralardı qayta tiklew boyınsha xalıqaralıq shólkemler menen de birge islesiwler jolǵa qoyılǵan. Mısalı ushın, 2024-jıl Amerika Qurama Shtatları elshixanası Mizdaqxan kompleksindegi XII ásirge tiyisli “Erejep Xalifa” maqbarasın qayta tiklew ushın 80 mıń dollar ajırattı.
Bul islerdiń nátiyjeleri álbette tariyxıy orınlarǵa kelip atırǵan turistler aǵımınıń kóbeyiwinen kóriwimiz múmkin, sebebi keyingi
2 jıllıqta bul jerge keliwshi turistlerdiń sanı eki-úsh esege asıp, jılına 80 mıńǵa shekem shet elli turistler sayaxat etedi.
Sonday-aq, Prezidentimizdiń 2025-jıl 14-avgustta “Qaraqalpaqstan Respublikasın sociallıq-ekonomikalıq rawajlandırıwǵa qaratılǵan ilajlardı jáne de jetilistiriw haqqında”ǵı qararı menen Qaraqalpaqstan Respublikasınıń eski, taw hám dárya boyı aymaqlarında jańa turistlik marshrutlar mánzilli baǵdarlama tiykarında jolǵa qoyılıwı belgilengen. Mánzilli baǵdarlama menen Xojeli rayonı aymaǵındaǵı “Mizdakxan” arxeologiya-arxitektura kompleksinde turistlik komplekslerdi zárúr infrastrukturalar menen támiyinlew ushın
7,6 mlrd. sum qarjı ajıratıladı.
Álbette, Jurtbasshımızdıń ayrıqsha itibarı astında alıp barılıp atırǵan bul ilajlar nátiyjesinde respublikamızda sonıń ishinde
Xojeli rayonında úlken joybarlar ámelge asırılıp, rayonımız
Jańa Ózbekstannıń rawajlanǵan úlken bir aymaǵına aylanıwı kútilmekte. Bul jarqın keleshegimiz ushın úlken jańalıqlar hám rawajalanıwlar deregi bolıp xızmet eteri sózsiz.
-Mazmunlı sáwbetińiz ushın raxmet, jumıslarıńızda tabıslar tileymiz.

Sáwbetlesken Gúlnara Turdıshova, Qaraqalpaqstan xabar agentligi sholıwshısı