Májbúriy orınlaw byurosı Qaraqalpaqstan Respublikası basqarması hám onıń aymaqlıq bólimleri tárepinen sud qararlarına tiykarlanıp, puqaralar tárepinen ózbasımshalıq penen nızamsız qurılǵan qurılmalardı májbúriy buzıw jumısları ámelge asırılmaqta.

Atap aytqanda, usı jıldıń ótken dáwiri dawamında ámelge asırılǵan májbúriy orınlaw háreketleri nátiyjesinde respublika boyınsha jámi 200 den aslam nızamsız qurılmalardıń buzılıwına erisilgen, – deydi Májbúriy orınlaw byurosı Nókis qalalıq bóliminiń mámleketlik orınlawshısı Sulıwxan Qalmurzaeva. – Máselen, puqaralıq isleri boyınsha Nókis rayonlar aralıq sudınıń 2024-jıl 23-dekabr kúngi orınlaw hújjetine tiykarlanıp, Nókis qalası «Samanbay» mákan puqaralar jıyını «Súwenli» kóshesindegi 370 kv.m. jer maydanına ózbasımshalıq penen qurılǵan tırnaqtı májbúriy buzıw hám jer maydanın jaramlı jaǵdayǵa keltiriw belgilengen.
Bul orınlaw hújjeti boyınsha Májbúriy orınlaw byurosı Nókis qalalıq bólimi mámleketlik orınlawshısı tárepinen orınlaw háreketlerine kirisildi. Sonıń ishinde, juwapkerge nızamsız qurılmanı óz esabınan buzıwı kerek ekenligi haqqında bir neshe márte túsindiriw hám eskertiw berildi. Soǵan qaramastan, juwapker tárepinen nızamsız qurılma ıqtıyarlı túrde saplastırılmaǵan.
Sol sebepli, bul nızamsız qurılma Byuro xızmetkerleri tárepinen, arnawlı texnika quralları járdeminde májbúriy buzıp taslandı.

Qaraqalpaqstan xabar agentligi.