Nókis qalasındaǵı 55-sanlı ulıwma orta bilim beriw mektebinde ótkerilgen «Dóretiwshi muǵallimler V olimpiadası»nıń Qaraqalpaqstan Respublikası basqıshı bolıp ótti.

Onda usı olimpiadanıń Nókis qalası hám rayonlıq basqıshlarında jeńimpaz bolǵan mekteplerdiń komandaları belgilengen shártler tiykarında óz-ara bellesti.
Qızıqlı ótken jarıs shártleri juwmaǵında, birinshi orındı Qońırat rayonındaǵı 46-sanlı mekteptiń “Ilǵor pedagoglar” komandası jeńip alıwǵa miyasar boldı.
Sıylı ekinshi hám úshinshi orınlar Kegeyli rayonındaǵı 1-sanlı mekteptiń “Qaraqalpaq qızları” hám Taqıyatas rayonındaǵı 6-sanlı mekteptiń “Marifat yulduzlari 2025” komandaları iyelewge eristi.
Jeńimpazlar Qaraqalpaqstan Respublikası Mektepke shekemgi hám mektep bilimlendiriw ministliginiń diplom hám estelik sawǵaları menen sıylıqlandı.

Adilbay Orazov,
Qaraqalpaqstan xabar agentligi sholıwshısı