Keyingi jılları elimizdiń bilimlendiriw sistemasında sanlastırıw hám zamanagóy texnologiyalardı engiziw boyınsha sezilerli ózgerisler baqlanbaqta. Sabaqlarda tek ǵana kitap hám dápter emes, al zamanagóy sanlı sheshimler de oqıwshılarǵa járdem beretuǵın dáwir baslandı.

Ásirese, oqıtıwshı hám oqıwshı arasındaǵı baylanıstı ápiwayılastıratuǵın, qadaǵalawdı bolsa anıq hám qolaylı túrge keltiretuǵın texnologiyalarǵa talap barǵan sayın artıp barmaqta.
Bul processte Qıtay menen jolǵa qoyılǵan jańa birge islesiw joybarı – aqıllı klasslardı jaratıw baslaması óz waqtında baslanǵan hám ámeliy nátiyje beriwi kútilip atırǵan áhmiyetli qádem sıpatında itibardı tartpaqta.
Pekindegi Ózbekstan elshixanasında bilimlendiriw texnologiyaların rawajlandırıwǵa qaratılǵan gezektegi áhmiyetli hújjetke qol qoyıldı, delinedi Qánigelestirilgen bilimlendiriw mákemeleri agentligi maǵlıwmatında. Qıtaydıń “CHongqing Shulian Tianxia” kompaniyası hám Qánigelestirilgen bilimlendiriw mákemeleri agentligi óz-ara birge islesiw haqqındaǵı memorandumǵa qol qoydı.
Kelisim sheńberinde bir qatar iri joybarlardıń ámelge asırılıwı rejelestirilgen. Bárinen burın, 60 jasalma intellekt kameraları menen úskenelengen aqıllı klass jaratıw boyınsha pilot joybar jolǵa qoyıladı. Bul klasslar oqıw procesin baqlaw, sabaq nátiyjeliligin arttırıw hám innovaciyalıq qatnaslardı engiziwge xızmet etedi.
Birge islesiw bilimlendiriw procesin modernizaciyalaw, sanlı transformaciya hám joqarı texnologiyalar tarawındaǵı kooperaciyanı da óz ishine aladı. Atap aytqanda, aqıllı bilimlendiriw, intellektuallıq óndiris hám elektron sanaat baǵdarlarında birgeliktegi texnologiyalıq sheshimlerdi islep shıǵıw rejelestirilgen. Joybar ushın zárúr bolǵan texnikalıq támiynat – úskeneler, programmalıq ónimler, ornatıw hám sazlaw jumısları tolıq qamtıp alınadı.
Memorandumǵa Qánigelestirilgen bilimlendiriw mákemeleri agentliginiń direktorı Sevara Shokirova hám “CHongqing Shulian Tianxia” kompaniyasınıń xalıqaralıq bóliminiń basshısı Van Tsziysi qol qoydı.

M.HOJIAKBAROVA, ÓzA