Ózbekstan Respublikası húkimetiniń baslaması menen Nókiste ótkerilip atırǵan Franciya mádeniyatı aylıǵı sheńberinde francuz fotosúwretshisi Erik Gurlannıń “Aral teńizi: estelik hám onıń gózzallıǵı” atlı fotokórgizbesi bolıp ótpekte.

– Búgin kópshilik Aral teńizin ekologiyalıq mashqalalar arqalı tanıydı hám biledi. Biraq, men bul saparı Araldı adamlarǵa gózzal orın sıpatında kórsetiwge háreket ettim, – deydi Erik Gurlan.
Kórgizbege 35 fotosúwret qoyılǵan bolıp, olar avtor tárepinen 25 jıl dawamında tayarlanıp kelingen. Eń áhmiyetlisi, súwretler XX ásir basında Xorezmli fotograf Xudayberdi Devonov qollanǵan eski fotografiya usılında, sol dáwirge uqsas fotoapparatta túsirilgen.
Maǵlıwmat ushın aytatuǵın bolsaq, franciyalı Erik Gurlan 1968-jılı Franciyanıń qublasında jaylasqan Lunel qalasında tuwılıp, 1990-93-jılları Parijde jaylasqan «Ceas de Hond» professional studiyasında fotograf bolıp jumıs isleydi. Sońınan 2000-jılǵa shekem Parijde professor sıpatında fotoreportaj, reklama, qara-aq analog fotobaspa boyınsha jaslarǵa tálim beredi. 2000-2002-jılları bolsa, erkin fotosúwretshi sıpatında Baltıq boyı, Rossiya, Qazaqstan, Qırǵızstan, Mongoliya ellerine sayaxat etip, bunıń nátiyjesinde «Adamlar hám peyzajlar» dóretpesin dóretedi.
Eriktiń dóretpeleri Franciyadan tısqarı, AQSh, Rossiya, Avstriya, CHexiya, Indoneziya, Gruziya, Qazaqstan, Qırǵızstan hám Izrailda ótkerilgen fotokórgizbelerge qoyılıp, bir qatar tańlawlarda jeńimpaz dep tabılǵan.
Atap aytqanda, ol 1996-jılı «Tetenal-Photographie», 1998-jılı «Kodak-Professionnel», 2003-jılı «Hasselblad», 2010-jılı «Keńpeyillik hám ashıq-aydınlıq» fototańlawlarında jeńimpaz bolǵan.
Franciyalı fotosúwretshiniń kórgizbege qoyılǵan fotosúwretlerdi 30-noyabrge shekem kelip tamasha etseńiz boladı.

Adilbay Orazov,
Qaraqalpaqstan xabar agentligi sholıwshısı.