Qaraqalpaqstan Respublikasınıń transport ministrliginde ministrliktiń juwapkerleri hám ǵalaba xabar qurallarınıń wákilleri qatnasıwında ministrlik tárepinen ámelge asırılıp atırǵan jumıslar hám aldaǵı rejeler boyınsha baspasóz konferenciyası bolıp ótti.

Ilajda Transport ministri P.Kaipbekov, Nókis xalıqaralıq aeroportı direktorınıń orınbasarı Q.Nuratdinov, «Uzairways» wákili I.Qudaybergenov, Nókis temir jol stanciyası baslıǵı B.Mustafaev, Transporttı rawajlandırıw sektorı bas qánigesi M.Jiyemuratov xalıq sanı jıl sayın kóbeyiwi nátiyjesinde jámiyetlik transportqa bolǵan talap ta artıp baratırǵanın atap ótti. Sonlıqtan xalıqqa avtotransport xızmetin kórsetiwdi jaqsılaw, jámiyetlik transporttıń jónelisleri tarmaǵın keńeytiw hám háreket quramın zamanagóy, ekologiyalıq taza mikroavtobus hám avtobuslar menen jańalaw baǵdarında keń kólemli jumıslar ámelge asırılǵanı aytıldı.
Atap ótilgenindey, búgingi kúnde respublikamızda jámi 424 jónelis boyınsha 2 mıń 790 jámiyetlik transport hám 12 mıń 121 jónelissiz taksiler xızmet kórsetip kelmekte. 1 mıń 169 elatlı punkti transport xızmetleri menen qamtıp alınǵan bolıp, jámiyetlik transportlar menen qamtıp alıw 99,2 procentke jetkerilgen. 2025-jıl dawamında 13 avtobus hám 16 mikroavtobus satıp alınǵan.
Brutto shártnaması – yaǵnıy «basıp ótilgen jol» hám «sapa» kriteriyaları tiykarında jolawshı tasıw xızmetin shólkemlestiriw maqsetinde Nókis qalasında 15 avtobus jónelisleri shólkemlestirilip, bul jónelislerge jıl juwmaǵına shekem 160 avtobus alıp keliw rejelestirilgen. «Baz Nukus Kompleks» kárxanasına avtobuslardı satıp alıw ushın 10 milliard sum kredit qarjıları ajıratılǵan. Jaqında «Sapsan trans Nókis» JShJ tárepinen derlik 11 milliard sumlıq qarjı esabınan lizing tiykarında 13 dana zamanagóy avtobus Qıtay mámleketinen alıp kelinip, 7-A sanlı «Nókis sawda kompleksi – Nókis arqa-batıs avtovokzalı» jónelisine qoyıldı.
Bıyılǵı jılı 12 jónelis shólkemlestiriliwi rejelestirilgen bolıp, bar jónelislerdi optimizaciyalaw arqalı transport jetip barmaǵan 3 elatlı punkt qamtıp alınadı. Búgingi kúnde jańadan 5 jónelis shólkemlestirilip, elektron tender tańlawları arqalı tasıwshılarǵa biriktirildi.
Qaraqalpaqstan Respublikasında 23 avtovokzal, avtostanciya hám 908 avtobus toqtaw bándirgisi bar. Sonnan jıl dawamında Tórtkúl rayonı avtostanciyasın hám Nókis avtovokzalı imaratın rekonstrukciyalaw, avtobuslar aralıq 65 bándirgini ońlaw jumısları isleniwi rejelestirilgen. Nókis avtovokzalı imaratın rekonstrukciyalaw jumısları dawam ettirilmekte. Respublika aymaǵında 11 avtobus bándirgisi jańadan qurıldı.
Jıl dawamında Avtomobil hám suw transportında qadaǵalaw aymaqlıq bólimi tárepinen 500 den aslam reyd ilajları ótkerilip, 3 mıń 588 huqıqbuzarlıq anıqlanǵan hám 2 mıń 400 ge shamalas jaǵdaylar boyınsha avtotransport basqarıwshılarına ilaj kórilgen.
Ministrlik tárepinen avtobuslarǵa shıǵındı filtrlerin ornatıw ushın 10 mıń dollar muǵdarındaǵı xalıqaralıq grantqa qatnasıw ushın hújjetler tapsırıldı. 7 mektepke hám mayıplıǵı bolǵan balalarǵa grant esabınan avtobus ajıratıw, sonday-aq, Ámiwdárya rayonı «Bostan» APJ ǵa grant esabınan ishimlik suwın alıp barıw boyınsha koncepciyalar islep shıǵılıp, «Jáhán banki», «Aziya rawajlanıw banki», «Islam rawajlanıw banki»ne usınıldı.
Házirgi waqıtta respublikada 2 mıń 790 jámiyetlik transport qurallarınan 1 mıń 200ine GPS qurılmaları ornatılǵan. 91 jónelis boyınsha háreketlenetuǵın avtotransport quralları Qaraqalpaqstan Respublikası «Jolawshı tasıwdı monitoring etiw hám qadaǵalaw» mámleketlik shólkeminiń avtomatlastırılǵan dispetcherlik bólimine integraciyalanǵan. Sonday-aq, Nókis qalasındaǵı 480 avtobus toqtaw orınları menen bándirgiler mámleketlik shólkemniń IVMS platformasına kirgizildi.
Press-konferenciyada ǴXQ wákilleri tárepinen jámiyetlik transportlardıń búgingi kúndegi jaǵdayı, jónelislerde háreketlenip atırǵan transport qurallarınıń jolawshı tasıwdaǵı tártipsiz háreketi, avtostoyankalardaǵı jaǵdaylar, jol bahalarınıń belgileniwi, jónelisler qamtıp alınbaǵan aymaqlarda xalıq ushın jaratılıwı rejelestirilgen ilajlar haqqında berilgen sorawlarǵa qánigeler tárepinen juwap berildi.

Qaraqalpaqstan xabar agentligi.