Nókiste “Aral Vet Mission” baslaması sheńberinde baslanǵan ámeliy birge islesiw veterinariya tarawında zamanagóy bilim, xalıqaralıq tájiriybe hám ilimiy jantasıwlardı bekkemlewge xızmet etpekte. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında baǵdarlama sheńberinde ámeliy shınıǵıwlar hám ilimiy seminar ótkerildi.

“Hayot” mámleketlik emes kommerciyalıq emes shólkemi, “Mushukkent” joybarı, sonday-aq, “Vitteria” hám “Appicena” kompaniyaları qánigeleriniń filial direktorı A.Esimbetov penen ushırasıwı ótkerildi. Sáwbetlesiw dawamında aldaǵı seminarlar, sterilizaciya boyınsha xirurgiyalıq ámeliyatlar, ilimiy bayanatlar hám oqıw-metodikalıq almasıw máseleleri dodalandı. Atap ótiliwinshe, bul birge islesiw jergilikli jas qánigeler ushın áhmiyetli ámeliy mektep bolıp, tarawda jańa ilimiy qatnaslardı qáliplestiriwge tiykar jaratadı. Ushırasıwdan soń miymanlar filialdıń zamanagóy laboratoriyası menen tanısıp, usı jerdiń ózinde dáslepki ámeliy sabaqlardı basladı. Sabaq dawamında pıshıqlar menen iytlerdi sterilizaciyalaw procesiniń tiykarǵı basqıshları – ámeliyat bólmesin tayarlaw, qáwipsizlik qaǵıydalarına ámel etiw, xirurgiyalıq materiallardı bahalaw hám zamanagóy texnologiyalardan paydalanıw boyınsha ámeliy kórsetpeler berildi.
Seminarǵa filial professor-oqıtıwshıları, student-jaslar hám ámeliyatshı veterinar qánigeler qatnasıp, zamanagóy xirurgiyalıq usıllar boyınsha teoriyalıq hám ámeliy kónlikpelerin bekkemledi. Ámeliyatlar filialdıń laboratoriya bóliminde ámelge asırıldı. Tájiriybeli veterinar xirurglar – M.Badalov, N.Raximullina hám A.Gladishevalar tárepinen ótkerilgen ámeliyatlar joqarı dárejede shólkemlestirildi. Olar hár bir xirurgiyalıq basqıshtıń ilimiy tiykarları hám ámeliy áhmiyetin izbe-iz túsindirip bardı.
– Bul jerde studentlerdiń kásiplik bilimge bolǵan qızıǵıwshılıǵı júdá joqarı. Biz kórsetip atırǵan usıllar xirurgiyalıq mádeniyattı arttırıp, pútkil aymaqtıń veterinariya sistemasınıń zaman talaplarına say rawajlanıwına xızmet etedi, – deydi Rossiyalı veterinar qánige Alena Petrochenko.
Ótkerilgen seminar Qaraqalpaqstan veterinariya sisteması ushın áhmiyetli ámeliy maydan bolıp, jas qánigelerdiń mamanlıǵın arttırıw, jańa texnologiyalardı engiziw hám tarawda ilimiy qatnastı kúsheytiwde úlken áhmiyetke iye bolmaqta. Qánigelerdiń pikirinshe, bul baslama haywanlardıń salamatlıǵın qorǵaw hám veterinariya xızmetleriniń sapasın arttırıwda áhmiyetli qádem bolıp esaplanadı. «Aral Vet Mission” baǵdarlaması 21-noyabrge shekem dawam etedi. Onıń sheńberinde ilimiy-texnikalıq bayanatlar, xirurgiyalıq ámeliyatlar, jańa usıllar boyınsha treningler hám mamanlıq arttırıwǵa qaratılǵan bir qatar ilajlar ótkeriledi.
Nókiste ámelge asırılıp atırǵan bul birge islesiw joybarı veterinariya tarawında professional bilim hám xalıqaralıq tájiriybe almasıwdı keńeytiwge xızmet etpekte.

Qaraqalpaqstan xabar agentligi