Aldın xabar berilgenindey, Qaraqalpaqstan Respublikası prokuraturası xalıqtıń turmısın úyreniw, xalıq ushın eń áhmiyetli másele – gúzgi-qısqı máwsimge tayarlıq procesin kózden ótkeriw maqsetinde aymaqlarda bolmaqta.

Qaraqalpaqstan Respublikası prokurorı Sh.Aminov Qaraózek rayonında bolıp, gúzgi-qısqı máwsimdi qáwipsiz ótkeriw boyınsha ámelge asırılıp atırǵan jumıslar menen tanıstı.
Dáslep, rayon prokuraturasında juwapkerlerdiń qatnasıwında máwsimge tayarlıq, azıq-awqat rezervlerin sapalı jaratıw, gúzgi agrotexnikalıq ilajlardıń orınlanıwı boyınsha islengen jumıslar sın kózqarastan dodalandı. Májiliste gúzgi-qısqı máwsimde barlıq kommunallıq xızmet kórsetiw tarmaqlarınıń turaqlı islewin támiyinlew baǵdarında ámelge asırılıp atırǵan jumıslar, bar mashqalalar hám olardı saplastırıw, xalıqtıń turaq jayları hám sociallıq taraw obektlerin gúzgi-qısqı máwsimge tayarlaw, xalıq, sociallıq hám xızmet kórsetiw obektlerinde elektr támiynatı, sonıń ishinde, avariyalıq jaǵdaylarda kórilip atırǵan ilajlar boyınsha juwapkerlerdiń málimlemesi tıńlandı.
Bunnan soń, “S.Kamalov” APJ aymaǵındaǵı mektep hám mektepke shekemgi bilimlendiriw obektleriniń máwsimge tayarlıǵı, ısıtıw sistemalarınıń jaǵdayı, ısıtıw qazanlarınıń ornatılıwı, energiya únemlewshi úskeneler hám olardıń islew nátiyjeliligi, kómirge mólsherlengen ısıtıw sistemasındaǵı obektlerge kómir ónimleriniń tolıq jetkerip berilgenligi hám saqlanıw jaǵdayı menen tanıstı.
Sonday-aq, “Esimózek” APJdaǵı 30-sanlı ulıwma bilim beriw mektebiniń qosımsha imaratındaǵı qurılıs jumısları menen tanısıp, obektti óz waqtında paydalanıwǵa tapsırıw hám jumıslardı sapalı juwmaqlaw, ısıtıw, elektr támiynatı sistemalarında energiya únemlewshi úskenelerden nátiyjeli paydalanıw boyınsha kórsetpeler berildi.

Qaraqalpaqstan xabar agentligi