Ózbekstan Ekologiyalıq partiyası Nókis qalalıq Keńesi tárepinen “Bárkamal áwlad” respublikalıq balalar mektebinde “Jaslar hám tábiyat: gúzgi máwsimdegi muhabbat” atamasındaǵı videorolikler tańlawınıń juwmaǵına baǵıshlanǵan bayram ilajı ótkerildi. Oǵan partiya belsendileri, deputatlar, “Bárkamal áwlad” respublikalıq balalar mektebiniń jámááti, jaslar qatnastı.

Bul tańlaw “Oyla, súwretke, videoǵa al, tásir et!” súreni astında shólkemlestirilip, jaslardıń ekologiyalıq mádeniyatın rawajlandırıw, tábiyatqa bolǵan mehirin hám juwapkershiligin arttırıwdı maqset etken. Sonday-aq, gúzgi máwsimde qorshaǵan ortalıqtı qorǵawǵa baylanıslı dóretiwshilik kózqaraslardı xoshametlew hám jaslardıń videografiya arqalı jámiyetke tásir kórsetiw kónlikpelerin arttırıw tańlawdıń tiykarǵı wazıypalarınıń biri boldı.
Tańlawǵa 27-31-oktyabr kúnleri start berilip, qatnasıwshılardan videorolikler qabıl etildi, 5-10-noyabr kúnleri aralıǵında jumısshı topar tárepinen saylap alınǵan eń jaqsı videorolikler sociallıq tarmaqlarǵa qoyılıp, olar boyınsha “layk” hám “kóriwler”di jıynaw procesi shólkemlestirildi.
Sıylıqlaw procesinde eń jaqsı dóretiwshilik jumıslarǵa diplomlar, estelik sawǵaları hám minnetdarshılıq xatları tapsırıldı.
Ilaj qatnasıwshılarınıń atap ótiwinshe, bunday baslamalar jaslar arasında ekologiyalıq mádeniyattı kúsheytiwge, tábiyatqa itibardı arttırıwǵa hám qorshaǵan ortalıqtı qorǵawda belsendilikti támiyinlewge xızmet etedi.
Ilaj sońında jaslar, ustazlar hám miymanlar tárepinen gúz máwsiminiń ráńbáreń tábiyat kórinisleri, ekologiyalıq mashqalalarǵa itibar hám tábiyatqa mehir haqqında pikirler bildirildi.
Usı baǵdarda Qaraqalpaqstan Respublikası partiya shólkemi Keńesi “Hayal-qızlar hám jaslar” klubı tárepinen shólkemlestirilgen “Tábiyattı men qalay kóremen” fototańlawı tabıslı juwmaqlandı.
Ilajda partiya belsendileri, deputatlar, “Bárkamal áwlad” respublikalıq balalar mektebi jámááti, “Jas ekologlar”, tańlaw qatnasıwshıları qatnastı.
Tańlaw jaslardıń qorshaǵan ortalıqqa baylanıslı dóretiwshilik hám jeke kózqarasların kórsetiwge, sonday-aq, sociallıq tarmaqlar arqalı ekologiyalıq ideyalardı keńnen úgit-násiyatlawǵa qaratılǵan. Tańlawǵa tábiyat, taza ortalıq, janzatlar, pataslanıw mashqalası yamasa eko-turmıs tárizin sáwlelendirgen fotolar qabıl etildi. Olar partiyanıń telegramm arqalı keńnen sáwlelendirilip, qatnasıwshılardıń “layk”lar arqalı qollap-quwatlanıwı názerde tutılǵan.
Tańlaw juwmaǵında eń jaqsı fotosúwretler, jeńimpazlar anıqlanıp, qatnasıwshılarǵa estelik sawǵaları, diplomlar hám minnetdarshılıq xatları tapsırıldı.
Ilaj “Bárkamal áwlad” respublikalıq balalar mektebi oqıwshıları tárepinen tayarlanǵan koncert baǵdarlaması menen dawam etti.

Qaraqalpaqstan xabar agentligi