Ózbekstan Respublikası Ministrler Kabinetiniń 2025-jıl 21-oktyabrdegi «Suw resursları shıǵınlarınıń aldın alıw hám irrigaciya tarmaqların jaqsılaw ilajları haqqında»ǵı qararına muwapıq, Qaraqalpaqstan Respublikasında suw xojalıǵı obektlerin modernizaciyalaw jumısları ámelge asırılmaqta.

Qarar tiykarında 2025-2026-jıllarda ulıwma uzınlıǵı 44,0 kilometr bolǵan 4 kanaldı betonlaw hám rekonstrukciyalaw jumısların orınlaw ushın 81 mlrd. sum, sonıń ishinde, usı jılǵa 13 mlrd. 885 mln. sum limit qarjısı ajıratılıwı belgilengen.
Atap aytqanda, Shımbay rayonındaǵı «Taǵjap» kanalı (13,3 km), Shomanay rayonındaǵı «Aqjap» xojalıqlar aralıq kanalı (8,0 km), Nókis rayonındaǵı «Soralı» kanalı (7,0 km) rekonstrukciyalanadı, al Taqıyatas rayonındaǵı «Eski keneges» kanalında (15,7 km) 2-basqısh rekonstrukciyalaw jumısları alıp barıladı.
Joybarlawshı shólkem «UzGIP» JShJ Qaraqalpaqstan filialı tárepinen joybarlaw-smeta hújjetleri islep shıǵılıp, ekspertiza oraylarına tapsırılǵan.
Búgingi kúnde obektlerde texnikalar hám qurılıs materialları jıynalıp, kanallardı betonlaw jumısları ushın topıraq qazıw jumısları ámelge asırılmaqta.
Kanallarda rekonstrukciyalaw jumıslarınıń ámelge asırılıwı nátiyjesinde olardıń paydalı jumıs koefficientleri jaqsılanadı, fermer xojalıqları hám xalıqtıń qıytaq jerleriniń, egislik maydanlardıń suw támiynatın jaqsılaydı. Kanallardı betonlaw nátiyjesinde suwdıń filtraciyası esabınan shıǵınlar azayadı hám bar suw resurslarınan nátiyjeli paydalanıwǵa tiykar jaratıladı.

Á.Jiyemuratov,
Qaraqalpaqstan xabar agentligi