Qaraqalpaqstan medicina institutında «Turaqlı ekologiya hám globallıq salamatlıq» temasına baǵıshlanǵan xalıqaralıq simpozium ótkerildi.

Bul áhmiyetli ilimiy ánjuman institut hám Koreya universiteti arasındaǵı ilimiy birge islesiw sheńberinde shólkemlestirildi.
Simpoziumdı Qaraqalpaqstan medicina institutınıń oqıw isleri boyınsha prorektorı Murat Kurbanazarov kiris sóz benen ashtı hám sońǵı jılları Ózbekstan hám Qubla Koreya arasında dúzilgen diplomotiyalıq kelisimler, olardıń unamlı nátiyjeleri haqqında aytıp berdi.
Ánjumanda Koreya universitetiniń professorı Jevok CHoy qatnasıp, eki tárepleme ilimiy baylanıslardıń búgingi nátiyjeleri hám perspektivaları haqqında maǵlıwmat berdi.
Simpoziumda respublikamız ilimpazlarınan tısqarı, Koreya universitetiniń 20 ǵa shamalas jetekshi professor-oqıtıwshıları, magistrantlar, doktorantlar hám studentler qatnastı.
Ótkerilgen ilaj dawamında ekologiya hám densawlıqtı saqlawǵa baylanıslı áhmiyetli temalarda bayanatlar tıńlandı.
Bul bayanatlarda ishimlik suwınıń sapası hám Aralboyı shańınıń salamatlıq hám klimatqa tásiri, Koreyadaǵı radonlardı azaytıw texnologiyaları, Aral teńizi ortalıǵınıń qońsılas regionlarǵa tásiri, sonday-aq, densawlıqtı saqlaw hám infekciyalardı qadaǵalaw sistemalarınıń salıstırmalı analizi ilimiy tiykarda sáwlelendirildi.
Sonday-aq, simpozium dawamında Ózbekstan hám Koreya ilimpazları klimat ózgerisleri, ekologiyalıq mashqalalar hám olardıń xalıq salamatlıǵına tásiri boyınsha óz-ara pikir alıstı.
Ilaj eki mámleket ilimpazlarınıń turaqlı ekologiya baǵdarında birge islesiwin ele de bekkemlewge xızmet etti.
Simpozim sońında instituttıń qábiletli jaslarınıń atqarıwındaǵı koncert baǵdarlaması qoyıp berildi.

Adilbay Orazov,
Qaraqalpaqstan xabar agentligi sholıwshısı