18-noyabr – Ózbekstan Respublikasınıń «Mámleketlik bayraq haqqında»ǵı nızamı qabıl etilgen kún múnásibeti menen Berdaq atındaǵı Qaraqalpaq mámleketlik universitetinde “Bir Watan, bir el, bir bayraq” ideyası astında ruwxıy-aǵartıwshılıq ilaj bolıp ótti.

Ilajǵa universitet professor-oqıtıwshıları, belsendi student-jaslar qatnastı.
Eń dáslep ilaj Ózbekstan Respublikası hám Qaraqalpaqstan Respublikası mámleketlik gimnleri menen baslandı.
Bunnan soń, universitet rektorı wazıypasın waqıtsha atqarıwshı Alımjan Dúysenbaev shıǵıp sóylep, mámleketlik bayraqtıń elimiz turmısındaǵı tutqan ornına ayrıqsha toqtap ótti. Ol óziniń shıǵıp sóylegen sózinde bayraq – bul ápiwayı belgi emes, al xalqımızdıń tariyxıy esteligi, búgingi qúdireti hám erteńgi kúnine bolǵan iseniminiń ayqın kórinisi ekenligine toqtaldı. Mámleketlik bayraq xalıqaralıq maydanda Ózbekstannıń abırayın hám máplerin sáwlelendirip, ǵárezsiz el sıpatında tanılǵan elimizdiń teń huqıqlı mámleketler qatarındaǵı ornı menen abırayın kórsetetuǵının atap ótti.
Sonday-aq, ol student-jaslardı mámleketlik nıshanlarǵa húrmet ruwxında jasawǵa, onıń áhmiyetin tereń ańlawǵa, bayraq astında pidákerlik penen miynet etiwge shaqırıp, ótkerilip atırǵan bul bayram ilajı mine usınday tárbiyalıq maqsetlerge xızmet etetuǵının aytıp ótti.
Ilaj dawamında student-jaslar tárepinen ana-Watan, tuwılǵan jerge súyispenshilik sezimlerin payda etiwshi qosıqlar hám saxnalıq kórinisler qoyıp berilip, bul keshege ózgeshe zawıq baǵıshladı.

Adilbay Orazov,
Qaraqalpaqstan xabar agentligi sholıwshısı.