Sońǵı waqıtları mámleketimizde mobil baylanıs operatorları tárepinen tarif hám xızmet kórsetiw bahalarınıń arttırılıwı haqqındaǵı maǵlıwmatlar keń jámiyetshilik, ásirese, sanlı xızmetlerden belsendi paydalanıwshı xalıq qatlamı arasında ayrıqsha dodalawlarǵa sebep bolmaqta. Búgingi kúnde mobil internet hám baylanıs xızmetleri tek ǵana jeke sóylesiw emes, al bilimlendiriw, biznes, mámleketlik xızmetlerden paydalanıw, onlayn kommerciya, aralıqtan islesiw hám sociallıq belsendiliktiń ajıralmas bólegine aylandı.
Usı múnásibet penen mobil baylanıs operatorları tárepinen tariflerdi arttırıw boyınsha Básekini rawajlandırıw hám tutınıwshılardıń huqıqların qorǵaw komiteti tárepinen úyreniw jumısları baslanǵanı málim etildi.
Komitet mobil baylanıs operatorları tárepinen tariflerdi arttırıw jaǵdayınıń ekonomikalıq hám huqıqıy tiykarların úyreniw maqsetinde usı jıldıń noyabr ayınıń baslarında operatorlarǵa tiyisli tártipte sorawlar jibergen.
Házirgi waqıtta mobil baylanıs operatorları tárepinen xızmetler qamtıp alıwın keńeytiw, infrastrukturanı jaqsılaw, kórsetilgen investiciya qárejetleri haqqında usınılǵan maǵlıwmatlar Komitet tárepinen tallanbaqta.
Úyreniw nátiyjesinde eger mobil baylanıs operatorları tárepinen básekige qarsı háreketler, atap aytqanda, muwapıqlastırılǵan processler yamasa jasalma baha arttırıw jaǵdayları anıqlanǵan jaǵdayda belgilengen tártipte tekseriw jumısları ótkeriledi hám nızamshılıqqa muwapıq qatań ilajlar kóriledi.

Nigora Rahmonova, ÓzA