Ózbekstanda energetika tarawı ekonomikalıq turaqlılıq hám regionallıq birge islesiwdiń áhmiyetli baǵdarı sıpatında rawajlanıp barmaqta.

Mámleketimizde ámelge asırılıp atırǵan reformalar, sonday-aq, qońsı mámleketler menen óz-ara paydalı sheriklikti bekkemlewge qaratılǵan ilajlar regionallıq energetikalıq qáwipsizlikti támiyinlewge xızmet etpekte. Awǵanstan menen birge islesiw bul processte ayrıqsha strategiyalıq áhmiyetke iye bolıp, eki mámleket arasındaǵı ekonomikalıq baylanıslılıqtı jáne de kúsheytpekte.
Usı jumıslardıń kólemin keńeytiw maqsetinde Tashkentte Energetika ministri Jwrabek Mirzamahmudov hám Awǵanstannıń “DABS” kompaniyasınıń bas direktorı Abdul Bori Umar basshılıǵındaǵı delegaciya arasında ushırasıw bolıp ótti. Onda Ózbekstan energetika kompaniyalarınıń basshıları hám juwapkerleri qatnastı.
Ushırasıwda usı jıldıń sentyabr ayında Ózbekstan Respublikası Prezidenti Shavkat Mirziyoevtiń BMSh Bas Assambleyasınıń 80-sessiyasındaǵı hám Tashkentte bolıp ótken Oraylıq Aziya mámleketleri basshılarınıń jetinshi Másláhát ushırasıwındaǵı shıǵıp sóylegen sózlerinde alǵa qoyılǵan baslamalar dodalandı. Atap aytqanda, Awǵanstan xalqınıń abadanlıǵın hám ekonomikasın qollap-quwatlawǵa qaratılǵan ideyalar eki mámleket birge islesiwin jáne de bekkemlep atırǵanı atap ótildi.
Sóylesiwde Awǵanstan aymaǵında ámelge asırılıp atırǵan joqarı kúshleniwli elektr uzatıw tarmaqları hám podstanciyalar qurılısı boyınsha jumıslar kórip shıǵıldı. Joybarlardıń házirgi jaǵdayı, texnikalıq sheshimleri, ámelge asırıw múddetleri hám jumıslardı jedellestiriw boyınsha usınıslar úyrenildi. Bul baǵdardaǵı ámeliy qádemler eki mámleket ushın strategiyalıq áhmiyetke iye ekeni atap ótildi.
Ushırasıw juwmaǵında 2026-jılı elektr energiyasın jetkerip beriw boyınsha tiyisli shártnamaǵa qol qoyıldı. Bul hújjet energetika tarawındaǵı óz-ara sheriklikti jáne de bekkemlep, eki mámleket arasındaǵı birge islesiwdiń ámeliy basqıshqa ótkenin ańlatadı. Sonıń menen birge, joybarlardıń turaqlı rawajlanıwı hám kelesi jıllarda energetikalıq birge islesiw kólemin keńeytiw ushın bekkem tiykar jaratıladı.

N.Ziyodullaeva, ÓzA