Ájiniyaz atındaǵı Nókis mámleketlik pedagogikalıq institutında 18-noyabr – «Ózbekstan Respublikasınıń mámleketlik bayraǵı haqqında»ǵı Nızamınıń qabıl etilgen kúni hám bul sánege 34 jıl tolıwı múnásibeti menen «Bir Watan, bir el, bir bayraq!» atamasındaǵı ushırasıw keshesi bolıp ótti.

Saltanatlı ilaj mámleketlik gimnler menen baslandı.
Ushırasıwǵa Qaraqalpaqstan Respublikası prokuraturasınıń aǵa prokurorı R.Jalǵasbaev, Ádillik ministrliginiń huqıqıy málimleme sektorı bas másláhátshisi M.Xojaxmetova, instituttıń milliy ideya, ruwxıylıq tiykarları hám huqıq tálimi kafedrasınıń baslıǵı E.Tilewov, sonday-aq, fakultetler dekanatınıń wákilleri, professor-oqıtıwshılar, tyutorlar hám studentler qatnastı.
Ushırasıwdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.
Ilajda shıǵıp sóylegenler tárepinen atap ótilgenindey, bıyıl mámleketlik suverenitettiń belgilerinen biri bolǵan biyǵárez Ózbekstan Respublikasınıń mámleketlik bayraǵınıń qabıl etilgenine 34 jıl tolmaqta. Ózbekstan Respublikası Oliy Kengashiniń 1991-jıl 18-noyabrdegi gezekten tıs VII sessiyasında tastıyıqlanǵan mámleketlik bayraǵı jer júzinde biyǵárez Ózbekstan degen mámlekettiń bar ekenligin ańlatadı hám ózinde milliy-mádeniy dástúrlerdi jámleydi.
Mámleketlik belgiler bárqulla muqaddes hám ullı bolıp tabıladı. Óytkeni, ol xalıqtıń ótmishi, búgini hám keleshegin ózinde jámlegen watannıń simvolı esaplanadı.
Ushırasıw keshesinde jaslarımız arasında mámleketlik bayraǵımızǵa bolǵan húrmetti bunnan bılay da arttırıwdıń áhmiyeti, mámleketlik belgilerden nızamlı túrde paydalanıw qaǵıydaları tuwralı maǵlıwmatlar berildi.
Ilaj qatnasıwshılar menen pikir-almasıw hám soraw-juwaplar menen dawam etti.

Qaraqalpaqstan xabar agentligi