Tómengi palatanıń májilisinde “Oraylıq Aziya hám Qıtay” formatı sekretariatı haqqındaǵı rejeni ratifikaciyalaw haqqında”ǵı Ózbekstan Respublikasınıń nızam joybarı kórip shıǵıldı.

“Oraylıq Aziya hám Qıtay” formatı platforma túrindegi mámleketleraralıq struktura bolıp esaplanıp, onıń sekretariatına Qıtay, Qazaqstan, Qırǵızstan, Tájikstan hám Ózbekstan tárepinen tiyisli shólkemlestiriw hújjetlerine qol qoyıw arqalı tiykar salınbaqta.
Atap ótilgenindey, bul diplomatiyalıq sóylesiw túri mámleketler arasındaǵı birge islesiwdi jańa basqıshqa kóteriw, óz-ara húrmet, isenimge tiykarlanǵan kóp ásirlik doslıq hám sheriklik baylanısları jáne tıǵız baylanıslardı ornatıw, ámeliy birge islesiwdi keńeytiw maqsetinde shólkemlestirilmekte.
“Oraylıq Aziya hám Qıtay” formatı sekretariatı 2023-jıl 19-maydaǵı usı formatqa aǵza mámleketler qabıl etken Sian deklaraciyasına muwapıq shólkemlestirilmekte. Sekretariat Formattıń atqarıwshı uyımı bolıp esaplanadı. Sekretariat Format qatnasıwshı mámleketleriniń sammitleri hám sırtqı isler ministrleriniń ushırasıwların shólkemlestiriw, texnikalıq hám málimleme tárepinen támiyinlewdi ámelge asıradı.
Bul nızam joybarı menen “Oraylıq Aziya hám Qıtay” formatı sekretariatı haqqındaǵı rejeni ratifikaciyalaw názerde tutılmaqta. Bul Reje kiris sóz hám 4 bólimnen ibarat. Hújjet penen Sekretariattıń wazıypaları, wákillikleri, strukturası hám quramı, huqıqı, minnetlemeleri jáne statusı huqıqıy bekkemlengen.
Atap ótilgenindey, nızam joybarınıń qabıl etiliwi “Oraylıq Aziya hám Qıtay” formatı sekretariatında Ózbekstannıń qatnasıwın támiyinlew, bul platformada regionallıq baslamalardı múnásip alǵa qoyıw, milliy máplerdi múnásip qorǵaw imkaniyatın beredi.
Májiliste nızam joybarı qabıl etilip, Senatqa jiberildi.

Muhtarama Komilova, ÓzA