Ózbekstan Respublikası mámleketlik bayraǵı qabıl etilgeniniń 34 jıllıǵı múnásibeti menen Bozataw rayonı qánigelestirilgen mektebinde “Bir Watan, bir el, bir bayraq” súreni astında bayram ilajı shólkemlestirildi.

Ilajǵa rayon prokurorı N.Saparov, rayon hákiminiń orınbasarı U.Saparov, mektep muǵallimleri hám oqıwshıları qatnastı.
Onda shıǵıp sóylewshiler tárepinen Ózbekstan Respublikası mámleketlik bayraǵınıń elimizdiń jámiyetlik-siyasiy turmısındaǵı tutqan ornın hám áhmiyetin keń túrde atap ótti. Atap aytqanda, bayraǵımızda sáwlelengen belgiler jaqsılıq, sadıqlıq, gózzallıq, tınıshlıq, jańalanıw tımsalı ekenligine, elimiz bayraǵın kózqarashıǵınday qásterlep-saqlaw, onı ulıǵlaw hám bálentlerge kóteriw – hár birimiz ushın ana Watan aldındaǵı parızımız ekenligine toqtaldı.
Ilaj juwmaǵında rayonlıq Mádeniyat bólimi hám qánigelestirilgen mektep jámááti tárepinen bayramǵa arnap tayarlanǵan koncert baǵdarlaması qatnasıwshılar názerine usınılıp, bul keshege ózgeshe kóterińki zawıq baǵıshladı.

Adilbay Orazov,
Qaraqalpaqstan xabar agentligi sholıwshısı