Qaraqalpaqstan Respublikası Málimleme-kitapxana orayında “INFOLIB OʻZBEKISTON-2025″ XIV Milliy málimleme-kitapxana hápteligi óz juwmaǵına jetti.

Bıyılǵı háptelik bir waqıttıń ózinde Ózbekstan Milliy kitapxanası hám Qaraqalpaqstan Respublikası, wálayatlar hám Tashkent qalası málimleme-kitapxana oraylarında shólkemlestirilip, tarawda jumıs islep atırǵan qánigeler ushın tájiriybe almasıw, jańa bilimler alıw hám kásiplik tájiriybelerin arttırıw maydanına aylandı.
Háptelik Jańa Ózbekstannıń 2022-2026-jıllarǵa mólsherlengen rawajlanıw strategiyasında belgilengen 72-maqset sheńberinde shólkemlestirilgen bolıp, xalıqqa málimleme-kitapxana xızmetin kórsetiw tarawın rawajlandırıw, kitapqumarlıqtı ǵalaba en jaydırıw hám «Kitapsúyer millet» ideyasın ámeliyatta turmısqa engiziwge xızmet etti.
– Háptelik sheńberinde «Betgerxanlıq – 2025» ilimiy konferenciyası, “Edo.ijro.uz sisteması haqqında tiykarǵı túsinikler hám onnan qalay paydalanıw usılları”, “Jasalma intellekt arqalı joqarı sheklerge qaray” temasında seminar-treningler, “Kitap – oy-pikir gáwharı, kitapxana – oy-pikir ǵáziynesi” atamasında dógerek sáwbeti, “Kitapxana marketinginde vizual kommunikaciya hám dizaynnıń ornı”, “IFLA Grantları: jas kitapxanashılar ushın xalıqaralıq tájiriybe almasıw imkaniyatı” sıyaqlı sabaqlar ótkerildi, – deydi Qaraqalpaqstan Respublikası Málimleme-kitapxana orayı baslıǵınıń orınbasarı Zibagúl Saparova. – Sonday-aq, jazıwshı, ilimpaz, jurnalist Allanazar Abdievtiń “Áyyemgi qaraqalpaqlar” atamasındaǵı kitap prezentaciyası, ádebiy kesheler, «Zakovat» intellektual oyınları, kitapxanalarǵa sayaxatlar kitapqumar jaslarda úlken tásir qaldırdı. Qaraqalpaqstan Respublikası Málimleme-kitapxana orayında 2025-jıl 10-14-noyabr kúnleri aralıǵında ótkerilgen háptelik sheńberinde 19 ilaj shólkemlestirilip, ilajda 1260 tan aslam kitapqumarlar qatnastı.
Háptelik dawamında kitapxana tarawına baylanıslı ilimiy-dóretiwshilik ushırasıwlar, sheberlik sabaqları, dógerek sáwbetleri hám kitap kórgizbeleri de ótkerildi.
Ilajlar kitapxanashılardıń bilimin bayıtıw, olardıń dóretiwshilik ideyaların qollap-quwatlaw hám jas áwladta kitap oqıwǵa qızıǵıwshılıqtı jáne de kúsheytiwge qaratılǵan. Háptelik juwmaǵında tarawdıń rawajlanıwına úles qosqan dóretiwshiler, qánigeler hám shólkemler Áliysher Nawayı atındaǵı Milliy kitapxana tárepinen sıylıqlandı.

Qaraqalpaqstan xabar agentligi.