Kitap jańalıǵı

Qaraqalpaqstan xalıq jazıwshısı Muratbay Nızanovtıń «Ashıq bolmaǵan kim bar» romanı, «Aqshagúl» povesti qayta baspadan shıqtı. Sonday-aq, ekinshi jer júzilik urıs dáwirinde bir azamattıń basınan ótken qıyınshılıqlar, júz bergen waqıyalar sáwlegengen jańa «Qaytıw» povesti jarıq kórdi.
M.Nızanovtıń usı kúnge shekem 20 dan aslam kitapları baspadan shıqqan.
Avtordıń «Ashıq bolmaǵan kim bar» romanında Ismayıl menen Xanzadanıń pútkil ómir boyı bir-birin súyiwi, hátteki, eki ashıqtıń biri dúnyadan ótse de sónbegen muhabbatı isenimli waqıyalar menen sáwlelenedi. Shıǵarma qaraqalpaq, ózbek tillerinde bir neshe márte járiyalansa da onıń ıqlasbentleri barǵan sayın artıp barmaqta. Bul basılım da kóp sanlı kitap oqıwshılarınıń sorawları boyınsha tórtinshi ret baspadan shıqtı.
«Aqshagúl» avtordıń realistlik shıǵarmalarınıń biri bolıp, ótken jıllar dawamında bul shıǵarma qaraqalpaq, ózbek tillerinde bir neshe márte qayta baspadan shıǵarılǵan. 2019-jılı tatar tilinde jarıq kórdi. Jaqın waqıtlarda túrk tilinde jarıq kóriwi kútilmekte. Bul kitap ta tórtinshi ret baspa júzin kórmekte.
Ekinshi jer júzilik urıs haqqında júdá kóp shıǵarmalar jazılǵan. Avtordıń jańa kitabı – «Qaytıw» povestinde sol sawash sebepli óz elinen, súyikli yarınan ayırılǵan, ásirese, jazıqsız «satqın» atın kóteriwge májbúr bolǵan bir azamattıń watan saǵınıshı tereń dramatizm menen sáwlelenedi.
Bul kitaplar siziń súyikli shıǵarmalarıńızǵa aylanadı, dep oylaymız.

Qaraqalpaqstan xabar agentligi