Ózbekstan Respublikası Prezidentiniń 2024-jıl 26-avgusttaǵı “Puqaralıq jámiyeti institutların mámleket tárepinen qollap-quwatlaw sistemasın jáne de jetilistiriw ilajları haqqında”ǵı pármanında hár jılı “Puqaralıq jámiyeti hápteligi”n ótkeriw názerde tutılǵan.

Maqset – Ózbekstanda erkin puqaralıq jámiyetin qáliplestiriw boyınsha ámelge asırılıp atırılǵan keń kólemli reformalardı milliy hám xalıqaralıq jámiyetshilikke jetkeriw, mámleketimizde puqaralıq jámiyetin rawajlandırıwdıń keleshegin talqılaw, sonday-aq, olardıń mámlektimizdiń rawajlanıwı jolında alıp barıp atırǵan jumısları boyınsha usınıslardı islep shıǵıwdan ibarat.
Nókis qalasında “Puqaralıq jámiyeti hápteligi” sheńberindegi puqaralıq jámiyeti institutları menen ashıq pikirlesiw, jámiyetlik dodalaw ilajları bolıp ótti.
Oǵan Qaraqalpaqstan Respublikası Joqarǵı Keńesiniń komitet baslıǵı Sh.Ótemisov, Oliy Majlis janındaǵı Jámiyetlik fondtıń bólim baslıǵı Z.Ibragimova, Qaraqalpaqstan Respublikası Ádillik ministri E.Tursunov, Oliy Majlis janındaǵı Jámiyetlik fondtıń Qaraqalpaqstan Respublikası aymaqlıq bóliminiń baslıǵı P.Turdımuratov, Joqarǵı Keńes deputatları, ministrlikler menen mákemeler, puqaralıq jámiyeti institutları hám ǵalaba xabar qurallarınıń wákilleri qatnastı.
Ilajdı “Yuksalish” háreketi Qaraqalpaqstan Respublikası aymaqlıq bólimi baslıǵı T.Romanov ashtı hám alıp bardı
Puqaralıq jámiyeti institutları (Mámleketlik emes kommerciyalıq emes shólkemler) mámleketimizde ámelge asırılıp atırǵan reformalardı barlıq tarawlarda jáne de jedellestiriw, xalıqtı sociallıq qorǵaw, densawlıqtı bekkemlew, ekologiyalıq mashqalalardı jedellik penen saplastırıw, jas áwladtı bárkamal etip tárbiyalaw jáne puqaralardıń medicinalıq, huqıqıy bilimlerin arttırıw hám basqa da bir qatar iygilikli jumıslarda belsene qatnaspaqta.
“Puqaralıq jámiyeti hápteligi” reformalar processleriniń barlıq qatnasıwshıları ushın konstruktiv sáwbetlesiw-pikirlesiw maydanı bolıp, olardıń jumısların birlestiriwge, Ózbekstanda puqaralıq jámiyetin jáne de rawajlandırıw boyınsha usınıslar islep shıǵıwǵa xızmet etedi.
Ilajda shıǵıp sóylegenler hám bayanatshı spikerler tárepinen mámleketimizde ámelge asırılıp atırılǵan reformalar barısında puqaralıq jámiyeti institutlarınıń jumısların jáne de rawajlandırıw, jetilistiriwde tarawda islenip atırılǵan jumıslar haqqında maǵlıwmatlar berildi. 2021-2025-jıllarǵa mólsherlengen puqaralıq jámiyetin rawajlandırıw Koncepciyasınıń nátiyjeleri hám 2026-2030-jıllarda puqaralıq jámiyetin rawajlandırıw Koncepciyasına usınıslar kirgiziw boyınsha pikir alıstı.
Atap ótilgenindey, 2021-2025-jıllarǵa mólsherlengen puqaralıq jámiyetin rawajlandırıw Koncepciyasına tiykarlanıp Nókis qalasında “Mámleketlik emes kommerciyalıq emes shólkemler úyi” shólkemlestirildi. Oǵan mámleketlik emes kommerciyalıq emes shólkemleri ornalastırılıp, materiallıq-texnikalıq jaǵdayları jaqsılandı. Sonday-aq, mámleketlik emes kommerciyalıq emes shólkemleri ushın málimleme-resurs orayı shólkemlestirildi. Olardıń basshıların Mámleketlik basqarıw akademiyasında qayta tayarlaw hám olardıń mamanlıǵın arttırıw kursları shólkemlestirildi. Mámleketlik emes kommerciyalıq emes shólkemler hám puqaralıq jámiyetiniń basqa da institutların mámleket tárepinen subsidiyalar, grantlar hám sociallıq buyırtpalar túrinde qollap-quwatlaw kólemi arttırıldı.
Sonday-aq, “Ózbekstan – 2030” strategiyası sheńberinde hár jılı qabıl etiletuǵın mámleketlik baǵdarlamada belgilengen ilajlardıń orınlanıwı boyınsha puqaralıq jámiyeti institutları tárepinen jámiyetlik qadaǵalaw, yaǵnıy jámiyetlik monitoringler hám jámiyetlik esitiwler, tıńlawlar alıp barılmaqta.
– Keyingi jıllarda ámelge asırılǵan ilajlar nátiyjesinde mámleketlik emes kommerciyalıq emes shólkemlerdiń huqıqıy kepilliklerin támiyinleytuǵın, zamanagóy demokratiyalıq talaplarǵa hám xalıqaralıq standartlarǵa juwap beretuǵın normativlik-huqıqıy baza jaratıldı. Sonıń ishinde, bul baǵdarda 20 dan aslam Nızam, Prezident hújjetleri hám Húkimet qararları qabıl etildi, – deydi T.Romanov.
Haqıyqattanda, Jańa Ózbekstanda erkin hám kúshli puqaralıq jámiyetin qáliplestiriw, onıń institutların mámleketlik hám jámiyetlik basqarıwdaǵı ornı menen áhmiyetin túp-tiykarınan arttırıw tarawında shólkemlestiriwshilik-huqıqıy tiykarlar hám mámleket tárepinen qollap-quwatlaw mexanizmleri jetilistirildi.
Jańa Ózbekstan sharayatında puqaralıq jámiyeti institutlarınıń rolin kúsheytiw, mámleket hám jámiyet arasındaǵı birge islesiwdi jańa basqıshqa alıp shıǵıwǵa qaratılǵan “2026-2030-jıllarda puqaralıq jámiyetin rawajlandırıw koncepciyası” joybarı islep shıǵılmaqta.
Ózbekstanda 2026-2030-jıllarda puqaralıq jámiyetin rawajlandırıw koncepciyası joybarı mámlekette puqaralıq jámiyeti institutlarınıń rolin kúsheytiw, mámleket hám jámiyet arasındaǵı óz-ara isenim hám birge islesiwdi jańa basqıshqa alıp shıǵıw, sonday-aq, puqaralardıń jámiyetlik turmıstaǵı qatnasın keńeytiwge qaratılǵan.
Konsepciya joybarı “joqarıdan tómenge” emes, al “tómennen joqarıǵa” principi tiykarında, tikkeley orınlardaǵı mámleketlik emes kommerciyalıq emes shólkemler, jámiyetlik belsendiler, ekspertler hám puqaralardıń usınısların ulıwmalastırǵan halda qáliplestiriwdi názerde tutadı.
Ilajda qatnasıwshılardıń pikir-usınısları tıńlanıp, Mámleketlik shólkemler menen birge islesiw memorandumı qabıl etildi hám “Puqaralıq jámiyeti hápteligi” Forumnıń Respublikalıq basqıshında qatnasıw ushın delegatlardı saylandı.
Ilaj dawamında qatnasıӯshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.