Búgin Ózbekstan mámleketlik kórkem óner hám mádeniyat institutı rektorı, professor Nodirbek Sayfullaev basshılıǵındaǵı professor-oqıtıwshılar instituttıń Nókis filialına xızmet saparı menen keldi.

Miymanlardı Qaraqalpaqstan Respublikası Joqarı bilimlendiriw, ilim hám innovaciyalar ministri A.Ayapov, filial direktorı wazıypasın atqarıwshı Q.Yusupov, professor-oqıtıwshılar aǵzaları jıllı júzlilik penen kútip aldı.
Ilajda filialdıń oqıw procesiniń sapası, ruwxıy-aǵartıwshılıq jumıslardıń sociallıq belsendiligin arttırıw hám ilimiy potencialdı bunnan bılay da jetilistiriw kerekligi, jaslardı Watansúyiwshilik, milliy hám ulıwma insanıylıq qádiriyatlarǵa sadıqlıq ruwxında tárbiyalaw, olardıń intellektuallıq hám dóretiwshilik potencialın rawajlandırıw, ilim hám kórkem ónerge baǵdarlaw boyınsha hár qıylı joybarlar menen baslamalardı jolǵa qoyıw zárúrligi atap ótildi.
Ótkerilgen ilaj dawamında N.Sayfullaev filialdıń professor-oqıtıwshıları menen de oqıw ornında oqıw-metodikalıq hám dual bilimlendiriw baǵdarlamasın jolǵa qoyıw, ruwxıy-aǵartıwshılıq, ilimiy-dóretiwshilik jumıslardı bunnan bılay da jedellestiriw, xalıqaralıq birge islesiw jumısları, sonday-aq, pitkeriwshilerdiń bántligin támiyinlew máseleleri boyınsha óz-ara pikirlesip, keleshekte birgelikte ámelge asırılatuǵın jumıslar belgilep alındı.
Ushırasıw sońında xalıq dóretiwshiligi kafedrası oqıtıwshısı Z.Yuldasheva hám kitapxana jumısı kafedrası oqıtıwshısı D.Aytimovalarǵa Joqarı attestaciya komissiyasınıń docent diplomlari tapsırılıp, olardıń ilimiy jumıslarında tabıslar tiledi.
Házirgi waqıtta tashkentli professor-oqıtıwshılar filial student-jasların metodikalıq qollap-quwatlaw maqsetinde sheberlik sabaqların ótpekte. Álbette, bunday óz-ara pikirlesiw hám sheberlik sabaqları filial professor-oqıtıwshıları pedagogikalıq is tájiriybesiniń artıwı, student-jaslarınıń bilimleriniń joqarılıwına óziniń paydasın tiygizedi dep oylaymız.

Adilbay Orazov,
Qaraqalpaqstan xabar agentligi sholıwshısı