Evropada balalardı internettegi zıyanlı kontentten qorǵaw maqsetinde kórilip atırǵan keskin ilajlar kúsheymekte. Italiya jaqında ádepsiz saytlar ushın májbúriy jas sheklew sistemasın engizdi.

Endi paydalanıwshılar hár sapar 18 jastan asqanın tastıyıqlaytuǵın húkimet ID hújjetin úshinshi tárep xızmeti arqalı júklewi kerek. Bul eski kontinentte sanlı qáwipsizlik boyınsha áhmiyetli reformalardan biri bolıp esaplanadı.
Franciya da usı baǵdarda áhmiyetli qararlar qabıl etken. Nızamsız saytlarǵa 18 jastan kishi óspirimlerdi kirgizgen provayderler júz mıńlaǵan evro járiymaǵa tartılıwı, sayt jabılıwı hám hátteki jınayıy juwapkershilikke tartılıwı sıyaqlı jazalarǵa ushıraydı. Soǵan qaramastan, ayırım tekseriw xızmetleri maǵlıwmattı basqa kompaniyalarǵa jetkerip berip atırǵanı yamasa ańsat aylanıp ótiwi múmkin ekeni anıqlanǵan.
Ispaniya bolsa zárúr kontentti filtrleytuǵın hám jastı anıqlaytuǵın sanlı identifikaciya sistemasın engizbekte. Milliy policiya tárepinen islep shıǵılǵan jańa qosımsha real waqıt rejiminde jastı tekseredi. Soǵan qaramastan, mámlekettiń keńirek sanlı identifikaciya joybarı házirshe maǵlıwmatlardı qorǵaw qaǵıydası sebepli toqtatılǵan.
GFR tek ǵana “Men 18 jastaman” degen tastıyıqlawdı qabıl etpey atır. Mámlekette sanlı identifikaciya, ata-ana tárepinen basqarılatuǵın filtrlew sisteması hám hár bir platformada jaslardı qorǵaw boyınsha juwapker oficer bolıwı talap etiledi. Sudlar ayırım saytlardı balalar qáwipsizligi menen baylanıslı talaptı qastan buzǵanlıqta ayıplap, olardı keskin sınǵa alǵan.
Evropa Awqamı bolsa házir birden-bir, jekelikti támiyinleytuǵın hám jeke maǵlıwmattı járiyalamastan jastı tastıyıqlay alatuǵın ulıwmalıq sistema ústinde islep atır. Bul mexanizm barlıq mámleketlerde 2026-jıldıń aqırına shekem engiziliwi rejelestirilgen. Sol tárizde Evropa internette jas óspirimlerdi qorǵaw boyınsha ulıwmalıq, qatań hám integraciyalasqan siyasatqa qaray qádem taslamaqta.

Musulmon Ziyo, ÓzA