Túrkmenstan mádeniyat ministri Otageldi Shomurodov búgingi globallasıw sharayatında mádeniyat tek ǵana xalıqtıń ruwxıy miyrası emes, al mámleketler arasındaǵı doslıq hám óz-ara isenimdi bekkemlewshi eń kúshli qural ekeni, mámleketlerimiz arasındaǵı mádeniy baylanıslardıń jedel rawajlanıwı mine usı principlerge súyenetuǵının atap ótti.

Sonday-aq, mámleketlerimiz basshıları arasındaǵı doslıq qarım-qatnas, joqarı dárejedegi ushırasıwlar hám strategiyalıq kózqaraslar mádeniy birge islesiwdiń bekkem tiykarın jaratqanına itibar qarattı. Áyne siyasiy isenim mádeniyat tarawındaǵı birgeliktegi baslamalardıń keńeyiwine kúshli túrtki bermekte.
– Búgingi kúnde dóretiwshilik almasıw baǵdarlamaları, koncert, spektakl, kórgizbe, ádebiy ushırasıw hám mádeniyat kúnleri eki xalıqtı jaqınlastıratuǵın eń nátiyjeli platformalarǵa aylanǵan, – deydi rásmiy. – Bul ilajlar tek ǵana rásmiy sheńberde emes, al keń jámiyetshilik tárepinen de qızǵın kútip alınbaqta. Ózbekstan hám Túrkmenstanda shólkemlestirilip atırǵan mádeniyat kúnleri jas áwladta milliy kórkem ónerge húrmet sezimin qáliplestirip, dóretiwshiler arasındaǵı ustaz-shákirt dástúrin jańa basqıshqa alıp shıqpaqta. Xalıqaralıq forumlar bolsa regionlıq mádeniy diplomatiyanı rawajlandırıwǵa salmaqlı úles qospaqta. Ásirese, birgeliktegi joybarlar keń jámiyetshilik ushın ózine tán waqıyaǵa aylanıp, doslıǵımız bekkemliginen derek bermekte. Mádeniyat tek ótmishti saqlaw emes, al keleshekti de jaratıw. Demek, mádeniy jaqınlıǵımız búgin bekkem, erteń jáne de keń kólemli bolatuǵınına isenemiz. Biziń wazıypamız – usı awızbirshilikti izbe-iz dawam ettiriw.

Musulmon Ziyo, ÓzA