Tájikstan Respublikası mádeniyat ministri Matlubaxon Amonzoda sońǵı jılları mámleketlerimiz arasındaǵı mádeniy birge islesiw misli kórilmegen dárejede jedelleskeni, bul process eki mámleket basshılarınıń aqılǵa uǵras siyasatı, óz-ara húrmet hám tariyxıy jaqınlıqqa sadıqlıǵı nátiyjesi ekenin atap ótti:

– Ózbekstan Prezidenti Shavkat Mirziyoevtiń baslamaları regiondaǵı mádeniy almasıwdı jańa basqıshqa alıp shıqtı. “Sharq taronalari”, “Xalıqaralıq maqam kórkem óneri festivalı” sıyaqlı iri ánjumanlar xalıqaralıq dárejede barǵan sayın keń itibarǵa iye bolıp, jas áwladtıń milliy kórkem ónerge qızıǵıwshılıǵın kúsheytpekte. Ózbek maqamı, klassikalıq ádebiyatı hám awızeki dóretiwshiligi region mádeniy ǵáziynesiniń biybaha baylıǵı bolıp esaplanadı. Tájik hám ózbek xalıqları muzıkası arasındaǵı únleslik, ırǵaqtaǵı jaqınlıq tariyxıy tamırlarımız birliginiń ayqın dálili.
Amonzoda maqomnıń ruwxıy hám mánawiy áhmiyetine ayrıqsha toqtap ótip, bul kórkem ónerdi xalıqtıń tariyxı, kewil keshirmesi hám ómir filosofiyasınıń názik sáwleleniwi sıpatında bahaladı:
Búgingi kúnde kórkem óner sheberlerimiz, dóretiwshilik jámáátlerimiz arasında jedel sóylesiw jolǵa qoyılǵan. Birgeliktegi joybarlar, teatr háptelikleri, mádeniyat kúnleri eki xalıq doslıǵın bekkemlep, mádeniy sóylesiwge jańa pát baǵıshlamaqta. Mámleketińizde mádeniyat tarawında ámelge asırılıp atırǵan keń kólemli reformalar, milliy miyrastı qásterlep saqlaw hám dúnya kóleminde úgit-násiyatlaw jolındaǵı is-háreketler maqtawǵa ılayıq. Ulıwma, mádeniyat xalıqlardı birlestiretuǵın eń qúdiretli kópir bolıp esaplanadı. Ózbekstan bul kópirdi jańasha ruwx, zamanagóy qatnas penen qurmaqta. Bul bolsa pútkil regionımızdıń ruwxıy rawajlanıwına xızmet etpekte.

Muslim Ziyo, ÓzA