Tashkent qalasında qılıshlasıw sportınıń sablya túri boyınsha jaslar arasında Jáhán kubogi bolıp ótti.

Onda jekpe-jek bellesiwlerde 89 sportshı jarıs jeńimpazlıǵı ushın óz-ara bellesiwlerge tústi. Quwanıshlı tárepi sonda, bul bellesiwlerde Ózbekstan saylandı komandası aǵzası, jerlesimiz Ayakóz Jumamuratova óziniń sheberligi hám ájayıp texnikası menen kópshilikti tań qaldırıp, jarıstıń finalına shekem jetip keldi.
Kuboktiń final bellesiwi bolsa neytral bayraq astında shıqqan Karina Talladaǵa qarsı oǵada qızıqlı ótip, sportshılar hár bir upay ushın keskin túrde gúres júrgizdi hám bellesiw 15:14 esabında juwmaqlandı.
Solay etip, bul jarısta jerlesimiz ekinshi orın menen shekleniwge májbúr boldı hám jáhán kuboginiń gúmis medalı iyesine aylandı.
Sportshımızdıń erisken bul úlken tabısı menen qutlıqlap, aldaǵı jarıslarda joqarı nátiyjelerge erisiwine tilekleslik bildirip qalamız.

Adilbay Orazov,
Qaraqalpaqstan xabar agentligi sholıwshısı.