Bárshemizge málim sońǵı jıllarda elimizde kóklemzarlastırıw, terek nállerin otırǵızıw, olardı qorǵaw hám jasıl maydanlardı keńeytiw boyınsha sistemalı ilajlar ámelge asırılmaqta.

Berdaq atındaǵı Qaraqalpaq mámleketlik universitetiniń jámááti hám student-jasları da respublikamız boylap keń kólemde ámelge asırılıp atırǵan “Jasıl mákan” ulıwma milliy joybarı sheńberindegi ilajlarǵa belsendi qatnaspaqta.
Usı baslama sheńberinde universitet jámááti tárepinen qalamızdıń Teleoray mákan puqaralar jıyını aymaǵında belgilengen maydanlarda kóklemzarlastırıw hám abadanlastırıw jumısları alıp barıldı.
“Jasıl mákan” joybarınıń tiykarǵı maqseti – qorshaǵan ortalıqtı qorǵaw, ekologiyalıq turaqlılıqtı támiyinlew, elimizdiń qala hám awıllarında jasıl maydanlardı keńeytiw arqalı xalıq ushın qolaylı ekologiyalıq ortalıq jaratıw bolıp esaplanadı.
Bul ilaj insan hám tábiyat arasındaǵı únleslikti bekkemlew, jas áwladta ekologiyalıq mádeniyattı qáliplestiriw, tábiyatqa mehir hám juwapkershilikti arttırıwǵa xızmet etedi.
«Jasıl mákan» ulıwma milliy joybarı sheńberindegi ilajlar fakultetlerde de ótkerildi.
Usı tiykarda fakultetler ózlerine biriktirilgen orınlarǵa terek nállerin otırǵızıw, kóklemzarlastırıw hám abadanlastırıw jumısların alıp bardı.
Sonday-aq, joybar sheńberinde atızlardı tazalaw, tereklerdiń túplerin jumsartıw, jerlerdi awdarıw hám tereklerge suw quyıw jumısları alıp barıldı.
Universitet jámááti tárepinen bunday baslamalardı turaqlı dawam ettiriw, tábiyattı qorǵaw boyınsha ámeliy jumıslar izbe-iz dawam etpekte.

Qaraqalpaqstan xabar agentligi