Berdaq atındaǵı Qaraqalpaq mámleketlik akademiyalıq muzıkalı teatrında Qaraqalpaqstan Respublikasına miyneti sińgen kórkem óner ǵayratkeri, pedagog, milliy saz ásbaplarınıń ustası hám sazende Azatbay Otarbaevtıń 65 jıllıq yubileyine baǵıshlanǵan eslew keshesi bolıp ótti.

Ilaj dawamında Qaraqalpaqstan Respublikası Mádeniyat ministriniń birinshi orınbasarı B.Allakov hám teatr direktorı P.Mamutov shıǵıp sóylep, ustazdıń mazmunlı ómir jolı, dóretiwshilik izlenisleri hám mádeniyattıń rawajlanıwına qosqan úlken úlesleri haqqında óz pikirlerin bildirdi.
Atap ótilgenindey, Azatbay Otarbaev qaraqalpaq mádeniyatı, muzıka hám kórkem óneriniń belgili tulǵası bolıp, milliy saz ásbaplarımızdıń anıq kórinisinde búgingi kúnge shekem jetip keliwinde úlken xızmeti sińgen ustaz. Ol óziniń pidayılıǵı, sheberligi hám ırǵaqları menen kóplegen shákirtlerdiń qálbinde iz qaldırǵan. Onıń jıllar dawamında dóretken nama-qosıqları, kórkem ónerge bolǵan sadıqlıǵı hám ustazlıq mektebi búgin de dawam etip, jas áwlad ushın ayqın úlgi bolıp xızmet etpekte.
– Qaraqalpaq xalqınıń eski saz ásbapların qayta tiklewde A.Otarbaev jemisli jumıs isledi. Ustanıń ómiri – bul izleniw, pidayılıq hám shın kewilden shıqqan kórkem ónerdiń ayqın úlgisi, – deydi Ózbekstan xalıq baqsısı Ǵayrat Ótemuratov. – Búgingi ilaj onıń 65 jıllıq miynet jolına bolǵan húrmet-izzettiń ayqın kórinisi bolıp esaplanadı.
Eslew keshesi dawamında Azatbay Otarbaevtıń kórkem ónerge qosqan úlesi jáne bir márte qádirlep eske alındı. Eslew keshesinde teatr ansambli, xalqımızǵa belgili artistler tárepinen onıń dóretpeleri atqarıldı.
– Búgingi keshe – eslew hám húrmettiń joqarı úlgisi boldı, – deydi perzenti Daniyar Otarbaev. – Biz perzentleri ilajdı shólkemlestirgen insanlarǵa ayrıqsha minnetdarshılıǵımızdı bildiremiz. Onıń miynet jolın jas áwladqa úgit-násiyatlaw, jumısın dawam ettiriw ilajları húkimetimiz tárepinen qolǵa alınıp, xalqımızdıń bay miyrasın jáne de qásterlep saqlawǵa, rawajlandırıwǵa ayrıqsha itibar qaratılmaqta.
Respublikamızdaǵı balalar muzıka hám kórkem óner mekteplerinde A.Otarbaevtıń izbasarların tárbiyalaw, ustazdıń mektebin jaratıw hám keń kólemli úgit-násiyatlawǵa qaratılǵan ámeliy ilajlar ámelge asırılmaqta. Tiykarǵı maqset – belgili kórkem óner ǵayratkerine múnásip miyrasxorlardı jetistiriwden ibarat. A.Otarbaevtıń ibratlı ómiri hám miynet jolına baǵıshlanǵan hújjetli film qatnasıwshılardıń itibarına usınıldı.

Qaraqalpaqstan xabar agentligi.